來論 | 攬炒派「代表」？無人識你喎！

稀思路/筆是機場

喺筆者「年紀尚輕時」，有前輩語帶感慨地同筆者講，呢個世界「人在人情在」，言下之意，即係如果「人已不在」，人哋就唔會理你，甚至連你係邊個都唔會記得；呢番說話，基本上可以套用喺任何圈子上，包括政圈。最近，香港民研發表最新嘅「市民最熟悉政治人物排名榜」，係首次無攬炒派（佢哋稱為「民主派」）進入頭十名，筆者就喺度諗，一班攬炒派政客曾經喺香港搞風搞雨，人氣高企，依家咁快就無人記得佢哋，到底係香港人善忘？定係佢哋根本唔喺市民心中呢？

香港民研嘅民調，一直都為人詬病，有唔少人認為佢哋係借民調、搞政治，參考價值唔高；不過，筆者用逆向思維睇今次香港民研嘅調查，就係當「攬炒派御用調查機構」都指出好多人已經「記唔起」攬炒派政客，咁攬炒派政客嘅人氣，可能真係低得可憐。睇返個調查，所有攬炒派政客「十名不入」，即使係第11至20名，亦只有李柱銘、陳方安生及黃之鋒。對此，香港民意研究所副行政總裁鍾劍華表示「不意外」，指市民偏向想起曝光率高政治人物；但筆者就覺得，事實應該係香港市民，已經淡忘咗攬炒派人士！

之前筆者寫文章時，已經講過一個道理，就係香港人「好善忘」，今日可以「深愛」你，聽日就可以「忘記」你，將相同情況套用喺政圈上，不論之前違法「佔中」以至黑暴運動時，攬炒派政客人氣「有幾高」，依家事過境遷，香港市民其實好快就忘記一啲人、一啲事，畢竟生活先係最重要，一啲已經過氣嘅政客，仲想香港人記掛在心？無可能！之前當攬炒派政客係「同路人」、「手足」，依家亦好明顯已經係陌路人。

至於鍾劍華稱喺市民心目中，「政治人物」大多係指喺政治制度下有影響力、有權力嘅人，所以市民或會對現今正在參與某崗位嘅人士較為熟悉等等，呢度就牽涉另一個問題，就係一個機構、負責人喺公布所謂民調時，係咪任得佢哋解釋呢？鍾劍華可以用佢嘅「思維」去解釋攬炒派政客不入頭十名嘅現象，但筆者用另一角度，或者講得直白啲，其實香港嘅攬炒派人物，係咪已經被香港市民所離棄呢？如果鍾劍華嘅說法正確，其實理論上，陳方安生以至李柱銘，應該係連頭廿名都唔入圍呀？

民調機構用熟悉等用語去問市民「最熟悉」嘅政治人物，筆者反而仲有另一種感覺，就係一啲政治人物，對市民而言到底係重要還是不重要。香港已經實施咗香港國安法，選舉制度亦已經完善，喺過去嘅日子，攬炒派政客可以利用制度去搞事，到咗新時代，攬炒派政客無得攬炒，亦不可能奪權，對攬炒派支持者嚟講，呢啲政客已經「不再重要」。仲有一點，就係攬炒派政客今日變得「無人識」，完全係佢哋咎由自取！如果當初唔係要搞黑暴，又借選舉想攬炒政府，今日又點會落得全軍覆沒嘅下場，甚至搞到香港人「唔記得」佢哋？所以話，攬炒派想玩攬炒，最後攬炒嘅，就只有自己。