來論｜梁頌恆「流亡」美國　問題關鍵是「錢從何來」?

筆是機場/稀思路

2016年立法會選舉，出現咗唔少人令人「意外」嘅結果，就如當時擺明鼓吹「港獨」嘅梁頌恆同游蕙禎，就被票選為「立法會議員」；不過，呢個世界總有啲「傻仔」、「傻女」，梁、游喺立法會宣誓時，竟然仲喺度玩嘢，宣示有「港獨」意味嘅小橫額，結果被裁定為宣誓無效，之後仲被判定議員資格無效。無咗立法會議員身份嘅梁、游，當然變成「甚麼都不是」。最近，已經潛逃到美國嘅梁頌恒，就喺網上訴說自己「租屋之苦」，講到要點樣搵當地港人做「擔保」；筆者睇事情，從來都係直搗問題核心，好想問一句，梁頌恆喺美國生活，到底錢從何來？

有媒體報道，梁頌恆日前喺一個網台節目，「分享」自己初到美國想租屋，但由於申請唔到信用咭儲「信用評分」，所以租屋時遇到業主要睇租客「信用評分」嘅難題，另外由於梁頌恆嘅「流亡」身份，佢喺當地又唔可以工作，無法提交收入證明，所以好難通過財務嘅壓功測試。好彩，梁頌恆最終搵到移居美國多年嘅香港人，對方答應做佢擔保人，佢先至有個「瓦遮頭」。

其實，如果講信用，筆者就覺得梁頌恆去邊都無可能有信用，因為一直拖欠立法會93萬元嘅薪酬同津貼，梁頌恆被立法會行管會入稟申請破產，結果法院認為梁頌恆一直對破產呈請無抗辯理由，所以正式頒令梁頌恆破產，當時由於梁頌恆聲稱唔會返香港，所以聆案官下令以電郵形式發出破產令通知。一個喺香港人格、誠信同財產都破產嘅人，去到美國甚至世界任何地方，理論上都係無信用可言先真！

而對於梁頌恆嘅美國生活嘅問題，筆者有個更大嘅迷思，首先佢喺香港本身爭立法會錢、被頒令破產，相信佢本人都唔會點富貴，而佢去到美國亦無工作（除非打黑市工？），問題唔止在於佢有冇得租屋，而係佢點解有錢租屋呢？美國嘅消費水平，未必俾香港低，一個人嘅租屋、飲食以至其他生活開支都唔係小數目，梁頌恆去咗美國已經有一段時間，筆者就諗，其實佢背後係咪有金主？如果有，「相關」嘅金主喺黑暴運動期間甚至再之前，係咪已經關照緊佢？如果梁頌恆所做嘅「對抗」活動係有外國勢力支持，咁佢可能就唔止係要「破產」咁簡單，而係隨時觸犯咗香港國安法。

今日梁頌恆，可能因為種種原因而可以喺美國風流快活，除非佢一世唔返香港，但只要佢一返嚟，相信就要為自己嘅種種行為「找數」；退一步講，就算佢真係打算一世唔返香港，筆者又會好奇，外國係咪真係會保佢一世呢？如果有一日佢成為咗棄卒，無人再關照佢，到時佢可以點？不論係梁頌恆、羅冠聰以至其他嘅攬炒派政客，佢哋今日仲可以喺外國「扮型」，但佢哋其實就好似一嚿唔可以「叉電」嘅電池咁，當佢哋無晒energy（能量），唯一嘅結果，可能就係被掉入垃圾桶，從此跟世界講bye bye！