與陳康琪首度合唱新歌　鄭世豪想盡快開騷

歌手鄭世豪今日（21日）為新歌《當這個時候》宣傳，並舉行線上直播，除邀得同門歌手陳康琪合唱外，還獲身在日本的好友吳業坤（坤哥）網上現身支持，為了遷就傳媒影「合照」，世豪與陳康琪便捧起電視，坤哥即搞笑問，「電視畫面係黑白定係彩色？」世豪便答他，「係彩色。」引來哄堂大笑。

世豪表示，直播期間會跟陳康琪合唱，這次是二人首次合唱，「我哋識咗好耐，出道前已認識，但合唱仲係第一次，我好想同佢出合唱歌，喺佢身上學跳舞，其實之前我都出過跳唱歌，但一個動作就要拍一個畫面。」陳康琪就鼓勵他要堅持。世豪又稱新歌是在去年製作，過去一年受疫情影響而沒機會唱歌，但今個月他便一口氣推出了三首歌，其中有兩首是參加「音樂永續」計劃的翻唱歌，問到會否想每個月都推出三首歌？他直言冇可能，「呢個就有啲跨張，但音樂會就每年都想開，希望疫情早日減退，可以開到音樂會，我已等咗43年。」

陳康琪則表示，近日忙於上戲劇進修班，希望有機會拍劇，同時又為個人網上頻道拍片，「都係偏向健康運動片多，因為依家去唔到健身室做運動，自己都肥咗4、5磅，人生未試過120磅，平時都係110幾磅，有日上朋友屋企磅重，以為個磅壞咗。」

（點新聞記者 梁靜儀 報道）