【點新聞報道】所謂「物離鄉貴，人離鄉賤」，近來唔少移民外地嘅港人都話覺得自己的生活降級。近日有一名移民加拿大的港人發文表示，「移民後先醒覺香港向上流真係比好多城市易好多」，指覺得加拿大嘅後生冇未來，由一出世到死個日，就被成個加拿大體制食哂所有錢，直言「我成日想像如果我冇香港嘅錢，應該抑鬱咗好耐」。
該名移加港人在社交平台threads發文表示，移民加拿大後，「覺得依度嘅後生先真正冇未來」，指一般在加拿大大學畢業生起薪約2.3萬港元，好似好唔錯，但扣稅後只有1.8萬。然後一般人享受到嘅福利差過香港，「大城市一房單位月租1萬2，唔低過香港好多，大部份嘢貴過香港最少10% 住細城市？你搵到工先算，依家連wfh都開始冇埋。加上北美文化都係傾向後生仔自己住，冇話可以同父母住唔洗比租、銀行月費、保險費、左扣右扣唔會有錢剩。投資？賺咗要比稅，看似一大堆免稅戶口，你都唔會有剩錢供」。
樓主以自身為例，「我自己就算搵5萬7港紙一個月，扣稅扣醫保扣公司退休金扣工會費，最後每個月得返3萬4」。樓主指，自己個人工係其年齡層係top5%，然而當地支出遠高過香港、投資回報遠低於香港(因為稅)。至於點解一直呻但又唔走，樓主坦言「最重要係因為我帶咗香港筆可觀嘅錢過嚟，我成日想像如果我冇香港嘅錢，應該抑鬱咗好耐」，話「完全唔明啲後生仔，搵得我一半，點樣生存喺呢個黐線嘅國家」。
樓主對比兩地生活差異，認為香港有「向上流」的機會，「喺香港地普通讀下書做下護士社工老師五寶，做下IT依類你一畢業已經搵多過唔少人，根本每個月唔係真係大洗，食嘢都唔洗點睇價錢，唔想點刻意儲都會有錢剩」。反觀加拿大就着重「睇學歷」，「你要做專業人士(除左IT)，大部份都係master起跳，最重要係人工其實唔係真係高好多」，對於有指做藍領都可以搵到食，樓主直指，「一般藍領除咗一開始搵多少少錢外，去到職業中期已經唔會同好少少嘅白領有分別」。
由於加拿大實行高稅收政策，樓主指打工仔係唔會有錢剩，「政府、保險、業主、大公司、銀行，每個月就係食哂你d錢。你係唔會有錢剩，唔會有錢儲，投資到都要比返稅。辛辛苦苦供嘅養老金？唔好意思你拎都係要比稅」，形容「由你一出世到死個日，成個加拿大體制就係食哂你所有錢」。
樓主將自己以前在香港的薪金與現在對比，「我供完樓/租完樓剩低嘅人工，都比起我喺多倫多稅後未用過嘅糧多」，更表示以前投資「投資賺100%就係100%，每個月開心都仲有好多錢剩」。
樓主補充指加拿大「都係一個唔鼓勵人哋努力嘅地方」，指如果本身不求上進，「你可以唔升職都搵到同你經理差不多嘅人工」，若然你是主任級或以上，「法律上係可以冇ot鐘同錢」，然後工作量係好幾倍，惟人工就僅高10-20%。反觀香港只要努力就有相應的人工，雖然專業人士會有壓力，但「起碼你上進，都有向上流嘅機會」。
樓主又力數加拿大落後，「醫療又唔係話真係好好，教育又唔係話好特別，多倫多起條地鐵線起咗唔知幾多年，高速公路發展幾十年不變，go train都仲係可以柴油列車，啲巴士地鐵又臭又舊，真正『五十年不變』」。而所謂北美第四大金融中心，人工卻低於美國中西部小鎮，但樓價就貴三倍，樓主狠批「冇嘢玩、冇嘢做」，連安排家人旅遊都難「香港玩5日都仲plan到，多倫多3日我都唔知點plan」。
帖文獲得不少網民認同，「同意，多倫多搵緊120萬港紙一年，實際一個月到手得6萬直頭升職都冇意欲，完全唔抵，職位流動性又低，唔似香港升職咁易。如果個人上進，有野心想上到高層十萬月薪+嘅話，香港會容易好多」、「諗起留喺到以後幾十年都要交3、4成稅，心都Up埋。冇生錢入，帶舊錢嚟都會有搣完嘅一日」、「加拿大難過香港除咗學歷，仲好靠關係。啲工（特別係工會工）大部分係圍內優先考慮，先再到外部。睇學歷仲睇彩數，搞完一大輪take home income 仲要少香港一半。真係難搞 」。
收藏
取消收藏
分享
