文/稀思路
當年黑暴運動，攬炒派政客、示威者搞遊行、遊行一場又一場，行動亦一次比一次激，最後黑暴人士敗走，佢哋當中有人聲稱香港「冇自由」，所以要潛逃或移居到外國生活，好喇，去咗英國等地方生活，係咪好有「自由」先？當然唔係啦，香港特區政府嘅警察，見有人搞事就制止，英國政府就更先進，直接上門叫移英嘅香港政客唔好再搞事，主角係邊個？就係正被香港警方通緝嘅國安法逃犯劉珈汶。
比起羅冠聰、許智峯等人，可能讀者對劉珈汶比較陌生，筆者可以先作簡單介紹，作為所謂「香港民主委員會」（HKDC）成員嘅劉珈汶，出生於1995年，喺2021年10月至2024年5月期間，就以「香港民主委員會」要員身份，除咗發表文章，仲多次透過演講、社交媒體發文等，鼓吹將香港從中國分離出去、要求外國制裁中國同香港特區，所以被香港警方以煽動分裂國家罪、勾結外國或者境外勢力危害國家安全罪通緝，懸紅100萬港元。
即係話，劉珈汶係一個香港國安法嘅通緝要犯，佢喺英國又發生咩事？事緣，有英國媒體指佢住喺泰晤士河谷地區，英國警方就曾經上門搵佢，要求佢簽署一份「諒解備忘錄」，要佢避免參加公眾集會，以及停止任何可能對佢引致風險嘅行動，簡單嚟講，就係叫佢唔好喺英國搞事，雖然劉珈汶把口就批評英國警方，但佢「誠實嘅身體」，就簽署咗備忘錄。
睇返相關新聞，可以將件事拆解為兩部分，第一部分關於公眾集會，筆者上網就留意到，佢應該喺今年三月喺英國參加過反華、反中國大使館計劃嘅示威，事後，佢仲喺社交平台批評英國警方，話英警歧視亞洲人，有選擇地阻止亞洲人「過馬路」，質疑警方執法標準。所以今次英警上門警告佢，其實係叫佢唔好喺英國再公開搞事。
至於英國警方好似好心地叫佢唔好參與對佢「有風險」嘅行動，據報原話係「（Cease any activity that is likely to put you at risk」，呢句話就吊詭喇，英國警方係怕佢有危險，定係意思指「如果劉珈汶再搞事，小心自己有風險」？筆者睇落去，同叫佢唔好再參加公眾集會一樣，意思都可能係話，如果佢再搞事，就會置自己於風險，所謂風險可能係指法律風險，英國人玩政治，係講得比較含蓄嘅。
劉珈汶批評特區政府以至國家時係威係勢，點解人去到英國，就變咗「烏龜」？咁樣簽「衰女紙」（純創作詞語），會唔會違反自己「不羈放縱愛自由」嘅性格？筆者建議，依家英國政府、警方擺明打壓佢，佢可以考慮發動一連串行動，首先召集在英嘅香港「同路人」，去英國國會或政府網站做網上聯署、請願，要求英國政府或警方立即停止打壓在英港人；第二，佢哋咁鍾意上街，依家英國禁止佢上街，好明顯更加要上街示威啦！第三，可以考慮向美國、聯合國控訴，指英國政府做法有違人權，就用呢三部曲，反擊英國政府。
以上三部曲／X部曲，喺攬炒派喺香港可能會用到嘅招數，但人到咗英國，就什麼都不是，劉珈汶敢唔簽備忘錄？羅冠聰等人，又會唔會一齊發聲？估計唔會，因為呢類攬炒派政客，視特區政府為敵人，又視英美主子如爹娘，一個sad but true嘅事實，就係去到外國，呢班人只能畀外國政客任擺任玩，喺香港時盲反，喺外國時盲忍。當初去外國為咗所謂「自由」，但到底邊個同佢哋講，西方國家就一定有自由呢？
收藏
取消收藏
分享
