文/稀思路
關於英國政府對香港嘅立場，如果要筆者用兩個字去形容，筆者會認為係「飄忽」，喺黑暴運動時，英國政府以至政客，都擺出一副「支持黑暴」嘅姿態，但講明係政客嘛，有時啲嘢，當然會高高舉起，繼而輕輕放下；直到最近，一啲香港人會用嘅BNO「5+1」方法移英，隨時會變成「10+1」。相同道理，英國政府準備修訂2003年引渡條例（指定第二部法域）指令》，係真係「切斷」同香港移交逃犯，定係「別有洞天」？
呢排，又有英國新聞觸動在英港人、政客嘅神經，英國政府準備修訂引渡法例，動啟喺個別情況下，向香港移交逃犯，有在野議員批評工黨政府，甚至話英國政府「背棄」港人，但係，英國內政部保安事務國務大臣翟偉紳就回應，話修訂係為咗讓暫停同香港引渡嘅條約變得有「法律效力」，內政部就指，修例後嘅引渡請求，會由英國法院審立審議，如果法庭認為引渡被視作出於政治動機，英國法院擁有廣泛權力阻止引渡發生。
呢件事，到底應該點去睇？近日都有評論文章指出，如果成功修例，就會由過去幾年對香港「零遣返」，變成容許一啲個案可以由法庭審議後遣返，即係算係打開咗引渡之門，如果有移英港人喺香港犯罪後逃至英國，係有機會遣返到香港，假設佢哋喺英國都有犯罪，引渡機會就會更高。
筆者就覺得，引渡與否嘅關鍵詞，在於「政治動機」上，如果將來香港向英國提出引渡要求，事件去到法庭，如果法庭覺得引渡要求係出於「政治動機」，例如純粹有人對香港特區政府有唔同意見，咁引渡嘅機會當然唔大。但問題嚟喇，如果有人行為擺明要顛覆、分裂國家，去到英國法庭，咁係咪都算「政治動機」？因為係英國，一樣有國家安全法，例如係「外國干預罪」、「破壞罪」甚至係叛逆罪等，若然英國法庭認為有人係觸犯咗香港嘅嚴重罪行，係引渡，定係唔引渡？
再進一步，或者筆者同讀者探討下一啲相對無咁嚴重嘅罪行，前排社會都好關注阮民安涉嫌盜竊繼而潛逃嘅案件，假設阮民安又返咗去英國，而香港特區政府提出引渡要求，阮民安嘅個案，應該無論點睇，都冇可能係政治動機或相關罪行，英國法庭係咪應該放人，等執法部門引渡阮民安返香港？凡此種種，英國修例表面上切斷咗香港同英國嘅正常引渡安排，但讀者們諗真啲，如果英國法庭真係依法辦事，好多潛逃英國嘅犯罪者，都應該「返嚟香港」。
其實有一點，移英港人、潛逃政客等，筆者覺得佢哋仲未係好清楚英國嘅取態，黑暴運動時，支持黑暴係美西方政客嘅「潮流」（實際上係出於反中），當然係有政客支持反政府嘅香港人；但係過咗幾年，其實成個世界都變晒啦，英國本土開始反移民，包括香港甚至烏克蘭嘅移民，而喺全球，因為美國嘅霸道，由歐盟到英國等，都要思考點樣同中國修補關係甚至合作，如果覺得外國會「攬住移民港人」一世，咁諗實在係太天真。最深刻嘅例子，就係英國如果再修訂移民門檻，移英港人都可能要「加監」（移民居住年期），英國好，美國都好，始終都冇可能當香港人係「自己人」！
收藏
取消收藏
分享
