文/稀思路
喺筆者唔同嘅文章當中，應該講咗至少十次、八次，移民嘅人可能一時衝動，或者受人煽動，所以放棄香港嘅高薪厚職，賣樓、賣車移民英國，結果英國「天氣不似預期」，自己生活又不似預期，形成巨大落差，唔少喺香港過慣好生活嘅人都選擇回流香港。最近，網上又出現移英人士回流香港嘅故事，其實，當初選擇走，一來一回，大費周章，如果返到香港屋又冇，工又要再搵，唔通真係為咗順應當時反對派唱衰香港嘅言論，就要攞自己生活嚟賭？
相比起之前嘅故事，筆者覺得今次呢個「夠有趣」，話說，最近有移英港男，上網發文狠批「英國真係垃圾地方，移民等於自毁前程」。呢個港男，就咁睇好似有啲來頭，入過蘋果做工程師，科大加英國名牌大學「雙碩士」學位，不過，喺英國就淪落到要做店員賣電話，佢聲稱自己好後悔去英國，所以決定回流。
返咗香港生活後，呢個港男嘅生活似乎就開始好返喇，除咗已經搵到工，仲經常出差到內地工作，有人質疑佢「何必當初」，亦有網民話如果喺香港人工OK，例如係一個月搵八萬元以上嘅中產，都應該留喺香港，因為外國唔係有學歷同錢就大晒，仲有網民話「回流不是壞事，試過唔啱就算」。
再睇返早少少嘅新聞，係有移英港人話身邊有唔少人回流，有人三個月就返香港，有人兩年返香港，仲有人覺得奇怪，有啲去咗加拿大、美國十幾廿年嘅人都回流，好想知道美洲依家有幾差。
可能有人覺得，部分網民講嘅嘢不能作準，但筆者就可以用數字去說明，呢啲移英、移美又回港嘅事，係千真萬確。根據政府統計處數字，2022年年中至2023年年中，香港人口係上升嘅，主要因素，係期內有14.3萬香港居民「淨移入」（唔計單程證），即係超過14萬喺唔同地方嘅香港居民，返嚟香港生活。
到2023年底至2024年底，香港人口都係上升，主要由於有2.1萬香港居民淨移入，睇以上兩組數字，筆者咁睇，2022至2023年，其實再推前一段日子，就係唔少人係咁講要移民嘅時間，到咗2022至2023年呢段時間，過十萬香港居民返嚟香港生活，說明了什麼？相信都唔需要筆者再解釋。
近期，香港各界又開始討論「軟對抗」問題，唔少傳媒仲陸續揭發書店、食店玩「軟對抗」；其實，一批又一批移民人士，當初選擇走，多多少少都係聽到啲「軟對抗」聲音，覺得香港唔好，所以要移民。不過，事實證明，英美澳加哪裡都好，原來始終都係香港最好，網上嘅個案以至政府統計都係事實。與其去其他國家做二、三、四等公民，不如喺香港發展，順便到內地睇下有咩發展機遇仲好啦。嗱，唔係筆者講嘅，而係今次故事嘅樓主，用生命去實踐「始終都係香港好」嘅事實！
收藏
取消收藏
分享
