文/稀思路
相信唔少讀者同筆者一樣，都係睇港產片長大，有睇開周星馳嘅，都會記得《九品芝麻官》入面嘅方唐鏡，呢個捩橫折曲嘅狀師，最強嘅就係「歪理當真理」、「好人當賊扮」。現實/現代生活中，有冇呢啲律師、大律師或者法官？有的有的，香港終審法院前非常任法官岑耀信正是也，佢繼早前抹黑香港法治後，近日又公開唱衰香港，仲為「35+顛覆案」、「立場新聞案」以至黎智英狡辯，其狡辯方式，就係「方唐鏡式」嘅歪曲是非。
為咗更全面了解佢講嘅嘢，筆者先喺網上搵咗一篇較為詳盡嘅報道去睇，一睇，嘩，講嘅嘢真係十分歪，例如佢提到香港國安法嘅最低刑期係「嚴苛」，其實我哋用常理去諗下，就會覺得岑耀信唔合理，因為國家安全法嘅目的在於保護國家安全、社會穩定，國安法嘅最低刑期如果低，就唔會有阻嚇力可言，就如外國嘅恐怖罪行，刑罰會唔會低到令罪行失去阻嚇力？
一路睇岑耀信嘅內容，越睇就越覺得唔合理，就如佢用英國工黨勝選「導致保守黨首相辭職而被控顛覆罪」去比較「35+顛覆案」咁，但「35+顛覆案」係想借勝選而令最終令政府癱瘓，同工黨勝選而政權更替係兩回事，岑耀信咁樣比較，係完全錯誤。
講到「立場新聞案」，岑耀信又認為涉及文章「全屬意見表達」，但係涉事文章有涉及抹黑法官、煽動他人、抹黑香港國安法、教人反抗等內容，之前喺英國，不同騷亂過千人被捕，一個有超過10萬個追蹤者嘅網民，就因為散播煽動種族仇恨嘅內容，被法庭判監三年；讀者們可以諗下，點解喺英國「煽動就係煽動」，但喺岑耀信眼中，喺香港「煽動就唔係煽動」呢？
但更為荒謬嘅，係岑耀信講到黎智英案時，佢話黎智英嘅欺詐案，係「技術上違反了租約」，但就被判有罪同判刑，咩叫「技術上違反了租約」？犯法就係犯法，有罪就係有罪，技術上違約但又冇犯法，呢個係咩玩法？如果呢個法理係通嘅，可唔可以話喺英國犯下不同罪行嘅人，係技術上違例而不能被判刑？
岑耀信作為資深法律界人士，對煽動、顛覆以至欺詐罪嘅理解，一定比我哋呢啲普通人深好多，但讀者以至各方可以諗下，有心癱瘓政府嘅政客，有冇犯罪；煽動他人抗爭嘅，有冇犯罪；欺詐政府嘅，又有冇犯罪。岑耀信呢種「方唐鏡式」嘅狡辯，如果係成立嘅，咁英國反政府嘅示威者，又係咪「沒有一個是有罪的」？
法治之所以為法治，係因為法律一視同仁，政客犯法與庶民同罪，岑耀信專為政客甚至政棍開脫，法律係佢熟悉好多，但筆者要問佢講嘅、狡辯嘅，係咪合乎常理先？大法官還大法官，如果講嘅嘢唔合理，其他人唔需要相信，甚至可以譴責佢扭曲法治，用心惡毒！
收藏
取消收藏
分享
