文/稀思路
近排，美國哈佛大學畀美國總統特朗普打壓，唔畀佢哋招收國際學生，鬧到滿城風雨，法庭將會成為佢哋下一個戰場；成件事最令人意外嘅地方，唔係特朗普玩打壓，而係哈佛大學敢還拖，當大至國家、小至企業都向特朗普跪低時，哈佛大學的確勇氣可嘉，但要有畀特朗普打壓到底嘅準備。其實，當各界焦點放喺哈佛大學時，美國以外嘅英國、澳洲以至加拿大，一樣有向移民或留學生動手，香港有部分人崇洋，鍾意去外國留學、移民外國，但喺呢個時勢，隨時會變成難民都唔出奇！
以澳洲為例子，可能讀者一向都覺得留學、移民澳洲「好安全」，但事實並唔係咁，最近就有單新聞，一個香港女留學生，今年3月同寄養家庭發生爭執，指女戶主增加額外限制，例如夜晚9點半後唔畀去廁所等等，之後因為女戶主大力拍佢門一段時間，佢受驚所以報案。事件最出奇嘅，並唔係澳洲當局作出調停，而係相關職員將佢押送到機場並遞解佢出境，仲要取消佢嘅入學確認書同住宿及福利確認書，該名女學生嘅家人，就直指澳洲有關方面做法粗暴，將會提出申訴，討回公道。
睇返報道，事情最新發展，該名女學生已經重回澳洲，入住新嘅寄宿家庭同攞返入學確認書，而澳洲有關方面嘅回應，就仲係模稜兩可，有啲話簽證唔關佢事，內政部又話事件唔關佢事，拒絕評論，成件事好似謎一樣；筆者就諗，女學生係中國人、香港人，喺澳洲受到不公待遇，掉返轉，如果寄宿學生來自英美，澳洲當局仲會唔會咁粗暴呢？係咪歧視華人，可能真係澳洲有關方面先知。
美國趕國際學生，澳洲又出現離奇遞解香港學生事件，筆者覺得，我哋可以將唔同事件放大啲嚟睇，例如，日前就有消息指，自從加拿大政府宣布削減移民人數，學生簽證總體下降20%，當中來自香港嘅新學生簽證持有者數量降幅最大，達到成40%。換個鏡頭去到英國，移民英國嘅人士包括透過BNO計劃移居英國嘅人，隨時要坐多幾年「移民監」先有機會成為英國永久居民。種種跡象顯示，英美澳加收緊移民或學生簽證係趨勢。
從宏觀角度睇，例如英國或者加拿大，簡單嚟講就係唔歡迎咁多移民，唔理你係來自香港定其他地方，移民過多，自然推高當地樓價，而且仲會同當地人「爭飯碗」；如果用美西方視角睇，其實亦係唔太歡迎香港人在內嘅移民群體，有部分港人覺得自己同西方「價值觀相近」，要移民過去呼吸自由空氣，其實呢種想法好傻，第一係人哋無當你哋係自己人，第二係外國生活根本就不如想像中美好。
最近，筆者花更多時間留意唔同嘅社交媒體，就見到有人發帖，話自己去過美西方唔同地方，其實香港生活始終係最好，包括安全以及生活環境，有網民就留言，如果喺美國，那怕只係夜晚喺紐約坐地鐵都可能有危險；另外同喺外國生活過嘅朋友傾偈，朋友話喺外國過冬，個人都易抑鬱啲，依家移民英美嘅人，好可能仲處於「自己呃自己」嘅階段。筆者唔係想講香港一定係最好，但至少想講嘅係，外國「唔一定好」，為咗一個所謂「信念」，而去擁抱唔安全甚至隨時被趕走嘅地方，真係為自己、為下一代好？有時呃人都算，千祈唔好呃自己嘛。
收藏
取消收藏
分享
