文/稀思路
「騙徒手法層出不窮」，但講起騙徒，可能大家有個刻板印象，以為騙徒會呃陌生人、街外人，但呢啲人忽略咗騙徒一個特質，就係騙徒都會呃自己人，而且係相當大貪嗰隻；如果讀者們仲有印象，可能會記得「黑暴藝人」阮民安，之前就用為「干犯暴動罪人士」籌款為名，眾籌完部分錢去咗賽馬會戶口，佢自己亦因為煽動及洗黑錢罪名被判監。本來，呢啲「黃吃黃」事件應該警醒到其他人小心「黃色騙徒」，不過始終係有啲人專呃返香港人，而且係睇住你有問題先嚟呃；最近，就疑似有移英港人開地產公司專呃移英港人，呢種情境，又令筆者諗起所謂「手足」，一直都只係「手Joke」。
太冗長嘅過程，筆者都係好似之前咁，唔詳細講太多，簡單嚟講，就係好多香港人都委託某間地產公司喺英國處理樓宇買賣，但一啲交易住宅輕則漏水，重則結構有問題，而且過程仲涉及有疑似假冒測量師製造「接近完美」嘅驗樓報告，有準業主去到銀行做按揭先知出事，如果買咗有問題住宅嘅，當然亦好似「中獎」咁開心啦。老實講，港人呃港人時有發生，「移英港人」呃「移英港人」，當然亦見慣不怪啦！
由呢件事，我哋睇到幾個問題，第一係有港人去英國搞地產公司專搵返「移英港人」生意，係相當有頭腦，只係手法不能接受；第二係呢啲事件亦透視咗部分「移英港人」嘅本質，就係唔熟唔食，見有其他「移英港人」唔識又急住搵樓，就抱住一種「送到埋嚟，唔呃你就對唔住你呢位老闆」嘅心態；第三則係呢種特質，同「黑暴藝人」阮民安專呃自己人如出一轍，不過無論呢啲事件發生咁多次，都始終會有人中招。
其實，如果我哋諗真啲呢件事，唔係有人「移居英國」被騙咁簡單，而係一啲「有心人」知道唔少有特定立場嘅港人急住移民英國，就將佢哋當係「羊咁劏」，類似事件，黑暴期間發生過唔少，甚至一啲黑暴政客或青年代表，都係利用「手足之情」周圍去問人借錢，唔還錢仲要擺出一副你吹我唔脹嘅姿態。今次筆者又睇到呢啲新聞，只係覺得原來有人去咗英國，都係逃不開被「自己人」欺騙嘅命運。
近日從其他新聞或網上分享，仲有其他英國新聞都睇到人幾唏噓，喺香港做開專業人士，去到英國做基層勞工，然後仲要安慰自己「會過去的」，筆者喺度諗，如果喺香港做開專業人士，然後去到英國買樓畀「自己人」呃，繼而返工由西裝友變成「工友」，咁樣佢哋移居英國，咪係「為了更差的生活？」喺學術界，其實已經有人論證過，傳統經濟學假設人係理性嘅動物，根本就係假嘅，「移英港人」、「移英黃絲」就係典型例子。
依家天氣寒冷，亦令筆者諗起冬天喺英國嘅日子，室內有暖氣還好，一出街就凍到想即刻行返入屋企，過去唔少關於英國嘅新聞或者「移英港人」嘅故事，真令人覺得呢個世界真太怪，總有人會作出令自己痛苦嘅決定；今次有「移英港人」疑似買樓被騙，筆者估喺往後嘅日子，依然會有人將「自己人」變成羊牯，香港嚟幾多移民就「盡量食幾個」，應驗一句歌詞：「受騙的那個比騙徒更混帳」。
收藏
取消收藏
分享
