稀思路/筆是機場
創業者對投資者說：「我想購回股份。」
投資者說：「好呀。」
創業者：「我想只計算實際資產及負債，以現時實際市值購回股份。」
投資者：「...不如用呢個價錢回購股份？...」
創業者：「感到非常震驚、無能為力、接受不了、竟然被要求以倍數計嘅價錢、團隊可能會集體辭職離開、面對鵲巢鳩佔嘅殘酷現實、別無他法之下、集體辭職亦都可能係作為一間小店，能夠向財雄勢大嘅上市集團作出抗議控訴嘅唯一方法 ......」
以上故事，大家聽到都可能覺得荒謬，一間公司想向投資者購回股份，竟然要求人用「計算實際資產及負債」嘅市值去賣股份？然後事敗，竟然仲玩情感勒索，話人哋「鵲巢鳩佔」，呢件事唔係筆者幻想出嚟嘅故事，而係已經發生嘅事實，話說由「黃人」渣哥、譚小環成立嘅「渣哥一九九六懷舊小食店」及「大渣哥茶記」，希望由「毛記葵涌」手上回購股份，不得要領之下，就開始玩批鬥，事件除咗反映「黃吃黃」係黃色經濟圈不變嘅本質外，亦反映咗黃人成日話自己幾齊心、幾有鬥志，一講到錢，其實必然反面。
要分析「渣哥VS毛記」一事，首先要搞清楚「渣哥」到底咩狀況。近日網上就有分析指，因為有「保就業」計劃，2020 /2021年，渣哥一九九六收入為2200萬元，賺180萬元；大渣哥收入2300萬元，賺320萬元；即係總收入4500萬元，賺500萬元。2021 /2022年，總收入6100萬元，蝕380萬元。如果分析係準確嘅，一間有6000萬元營業額嘅公司，都算係小店，渣哥到底喺度呃邊個？
一間公司有6000萬元營業額，然後要求大股東以「資產及負債」嘅市值去購回股份，合唔合理呢？筆者想講，絕對唔合理，因為一間公司嘅價值除咗睇資產同負債外，有讀過會計嘅朋友，都知道一間公司仲有一樣嘢好值錢，叫商譽（Goodwill），例如一間公司，可能佢剩資產只係得500萬元，但因為佢已經喺市場上建立咗地位，所以好多人光顧佢，令呢間公司嘅實際價值超過資產值嘅幾倍。相同道理，姑勿論「渣哥」係咪專吸黃人血，但佢喺所謂「黃色經濟圈」都有一定名氣，叫股東賣股份而要求「以2018年當時入股(只計算實際資產及負債)之同樣條件之下，以現時實際市值購回毛記葵涌持有之49%股份」，人哋唔接受都好正常。
除咗筆者，其實有唔少人包括網民，都認為渣哥嘅手法有問題，例如有網民就直指「輸果時人地出手幫，依家贏又想自己賺返晒？」、「疫情尾聲就想踢人出局自己賺曬，笑咗」、「咁樣逼人賣都係第一次見」；依家特區政府可能會再放寬檢疫政策，本港市場有望進一步復常，渣哥嘅做法，好多人都看在眼內。我哋中國人有句話，叫「人情還人情，數目要分明」，要人投資完又好似「做善事」咁賣番啲股份出嚟，唔成功就玩公審，能夠咁樣挑戰人類常識、認知嘅人，除咗「黃人」、攬炒派之外，都好難再搵例子了，但無論如何，「渣哥VS毛記」呢件事夠好睇，小二，唔該畀多碟花生嚟！
收藏
取消收藏
分享
