稀思路/筆是機場
曾經有段時間，大家上網，會睇到有人話「中咗（新冠）咪當感冒囉」、「瞓幾日咪無事」、「可以攞正牌唔返工」，「與病毒共存」嘅說法甚囂塵上；不過，自從本港出現越嚟越多確診、死亡個案，一班擁抱西方「共存」思想嘅攬炒分子，已經少咗講「與病毒共存」，因為佢哋知道，中咗新冠，真係會死人！其實，中咗新冠，就算唔死、無重症，一樣可以好大件事，前新聞主播、攬炒分子柳俊江，曾一度以為自己感染新冠如被「行宮刑」，就係一個好例子！
反政府傾向極為明顯嘅柳俊江，之前就自爆染疫，隔咗一個多星期，就透露自己已經康復出院，而「出院第一件事，就是想環繞港島行60公里慶祝，可惜由中環行到去赤柱時已感疲累，最後只走了約34公里就放棄」；不過，佢當時就唔認為體力下降係Omicron後遺症，仲話「如果有後遺症，我一出嚟就走到三十幾K咩？相比病毒嘅影響，十幾日不見天日嘅隔離生活，對健康嘅破壞仲大」，結果點呢？
日前睇新聞，就見到柳俊江「再次分享」近況，據報，佢話自己發病咗已經一個半月，但氣管仍然不太舒服，經常有痰、想咳同口乾，甚至唱歌「唱唔到平時可以達到嘅高音位」；重點嚟喇，佢仲話自己曾想同女友發生某種「行為」，不過當時「力不從心」，好彩之後都可以「開心、溫馨」返。柳俊江係咪完全恢復「某功能」？可能真係得佢自己先知，但好似電視廣告話齋，「中咗新冠，得咗重症，咪仲大件事！」香港人必須知道，感染新冠病毒，就算無死亡、重症，都可以有後遺症，就如有運動習慣嘅柳俊江，都會氣管差咗，「影響跑步」。
老老實實，好似柳俊江咁，感染後身體狀況變差，已經算係「不幸中嘅大幸」。睇返最新數字，第五疫情累計已經有數十萬人受感染，至今錄得4066宗死亡個案，死亡率為0.56%，係一個相當高嘅死亡率。如果根據呢個數字做推算，即係每一萬人，就有超過50人死亡，如果有100萬人感染，就有超過5000人死亡；喺死亡人士當中，絕大部分都係60歲或以上嘅長者，亦係市民嘅父母、祖父母輩最為高危。所以，面對世紀病毒，全港市民都應該小心應對，切勿相信「共存」謬論！
可能有人會覺得，極少數人士因為新冠病毒死亡，總好過社會「停擺」，商戶做唔到生意，市民去唔到「日本旅行」，但筆者想指出，有個道理叫做「針唔拮到肉唔知痛」，如果感染病毒去世嘅唔係大家嘅身邊人，大家可能講得輕鬆；但如果染疫身亡嘅係自己親人、朋友，大家仲可唔可以講得咁輕鬆呢？更何況，人命就係人命，根本唔應該放棄每一個人嘅生命，呢個亦係我哋國家所講「人民至上，生命至上」嘅道理。至於一啲選擇「與病毒共存」嘅國家，大家有冇諗過，其實佢哋未必想「共存」，只係佢哋政府，根本就辧法「清零」，所以用上糖衣包裝抗疫政策嘅失敗，表示實行「與病毒共存」呢？
收藏
取消收藏
分享
