泳兒與男友拍足9年 懶理家人催婚

歌手泳兒（Vincy）與髮型師男友Ziv拍拖9年。Vincy日前接受電視訪問時笑言：「呢個問題近年好多人問我！我對婚姻係順其自然，尤其是今年疫情，好多嘢都係未知數！我覺得只要彼此相愛嘅話，其實結唔結婚，並唔係最重要嘅事！」

不過,Vincy坦言最近常被家人催婚：「兩邊嘅屋企人都有催，特別係今年，唔知點解！不過換轉我企喺長輩角度睇，如果有一日我有小朋友，我都會催佢，所以都諒解嘅！(家人明示定暗示咁催你？) 都明示架啦，哈哈！會直接問『有冇諗過結婚呀？』咁樣，不過屋企人都畀自由我哋，唔會有時間表！」

此前Vincy拍攝新歌《溝渠暢泳》MV，與男主角大跳貼身舞，當時男友亦有現身監場。Vincy則表示：「佢唔係監場，佢係監我啲頭髮，哈哈！佢喺度唔會唔自然，反而我會更加做好啲！我覺得工作同感情要盡量分開啲，其實佢最關心係我有冇走光，佢明白藝人工作，所以自由度好大！」

（點新聞記者陳惠芳）