【點新聞報道】黃智雯(Mandy)在《隱門》因被衰老竇衰老公衰奶奶連環逼迫，經常一臉苦情，但網民相當受落，大讚她多了分成熟美、愈來愈靚兼角色有新鮮感。
談到角色要同時面對三個衰人，Mandy笑言壓力爆煲，並指自己慘變「生人勿近」：「呢個角色一直唔可以坦率面對身邊人，身心又受到好大壓抑同威脅，其實係好痛苦。自己拍嗰時都放鬆唔到條橡筋，幕後話拍嗰時唔敢行埋我度。」Mandy又笑指遭吳岱融打出「真感情」：「拍衝突場口我哋大家都冇話特別留力，嗰種逼真感帶動到我反應更加真實，我覺得正嘅。」為了準備角色，Mandy更專誠上了一個短期心理學課程：「主要想了解番喺唔健康家庭成長、身心靈受創嘅小朋友，對佢哋日後成長有咩影響。」
飾演衰老公的黃子恆續指是次是繼《降魔的》後再與Mandy合作，並笑謂上一次也是負責欺負Mandy。談到角色對白涼薄，問子恆拍攝時有否心理負擔，他笑言最緊要觀眾睇得過癮：「我講對白都冇乜顧慮，因為都知呢個角色一定唔討好，但每套劇每個角色有唔同功能，既然方向係咁，我咪全心全意去做，最緊要觀眾睇完有反應。」
（點新聞特約記者陳惠芳報道）
更多閱讀：
收藏
取消收藏
分享
