文/稀思路
上回提到,英偉達嘅黃仁勳「出軌」,成為咗美國政界攻擊對象,黃仁勳更因此辭去英偉達嘅總裁職位,筆者已經分析過,當中有黃仁勳係「華人」、特朗普同芯片因素;其中,自美國兩院控制權由民主黨奪回後,民主黨必然會對準現任總統特朗普嘅AI政策。有關分析講咗唔夠幾日就有新進展,民主黨已經準備出手,向OpenAI、Meta等出手,當中美嘅AI競爭方興未艾之時,美國似乎就要先嚟一場內戰。
據多間美國傳媒報道,民主黨奪回兩院控制權後,已經急不及待地醞釀一輪監管攻勢,可能會要求唔同嘅AI企業接受國會調查,會限制數據中心建設,甚至係暫停先進AI嘅研發;佢哋嘅目標企業都唔少,包括有OpenAI、Anthropic、Meta、Google、SpaceX等企業。
明明全世界都知道,未來社會變革係由AI推動,點解民主黨要反其道而行,想限制美國嘅AI發展呢?當中關鍵,在於唔同嘅科技公司,喺大舉投資數據中心同時,同當地居民爭奪電力同水資源。電費上升、環境受污染,更有住喺數據中心附近嘅居民投訴好多噪音,當特朗普大力推動AI時,民主黨好自然企喺佢對立面,叫停影響到民居嘅AI、數據中心發展。
民主黨嘅做法,其實仲係一箭雙鵰嘅做法,除咗環境問題,反對先進AI或者所謂嘅超級AI發展,民主黨可以話係「保就業」,亦可以話要防止超級AI對人類造成災難;同樣重要嘅係,特朗普再次上任美國總統後,同一班科技巨頭行得好近,部分科技巨頭甚至出錢出力支持特朗普,民主黨「打蛇打七寸」(抓住最核心要害),喺攻擊AI發展同時,仲可以打擊特朗普嘅支持者,實在何樂而不為。
黃仁勳唔同其他科技巨頭,佢嘅華人身份令佢好容易成為華府政客攻擊目標,其他巨頭未必會好似黃仁勳咁,但係往後要興建數據中心、發展先進人工智能,肯定會受制於民主黨。筆者覺得,呢個根本就係美國特色,政黨鬥爭凌駕於一切,科技巨頭同特朗普行得近,自然亦成為被攻擊對象;更何況,針對科技巨頭,仲係部分市民嘅想法,美國喺往後嘅AI競賽中如何自處,對美國政客嚟講,相對冇咁重要。
除咗黃仁勳之外,從各方面資料可見,SpaceX創辦人馬斯克,好可能會成為民主黨下一個攻擊目標,馬斯克雖然唔係華人,但係比起黃仁勳,佢同特朗普「走得更近」;睇Tesla、SpaceX嘅股權、投票結構,民主黨政客應該好難搞到馬斯克下台,但係透過不斷嘅傳召、調查、聽證等等,相信馬斯克會有段時間相當煩惱。
睇到黃仁勳以至美國嘅科技界新聞,筆者心入面有個好大嘅問題,黃仁勳、馬斯克以至其他發展緊AI嘅科技巨頭,其實佢哋每一個都可以話係世界上最聰明嘅一批人,點解生意搞起咗,反而之後可能會焦頭爛額?因為美國特色,包括美國嘅傳統權貴,本身就排拒呢批人,之前特朗普得勢,佢哋冇事;特朗普同共和黨失去兩院控制權,呢班科技巨擘就唯有等住被問、被查。
美式民主好簡單,邊個上台都好,第一件事係搞死對手、對手金主先,喺兩院選舉呢張音樂椅上,特朗普失去嘅係兩院控制權,而支持佢嘅科技巨頭最終會失去多少,大家可以食住花生「慢慢睇」。