【點新聞報道】周家怡主演電影《媽樣年華》日前獲母校聖嘉勒女書院包場欣賞，放映後家怡聯同導演胡翠兒入場謝票，獲全場師妹及老師熱烈歡呼。當日家怡就讀時的校長亦親自到場支持，與她深情擁抱，校方又送上花束及以家怡早前回母校探訪照片製成的燈箱，場面溫馨感人。
見到昔日校長及多位退休老師到場，家怡坦言非常感動。謝票期間，她特別勉勵師妹珍惜與家人相處的時間，鼓勵大家即使只是簡單傳送訊息給父母也是一份心意，「我以前好曳，成日鍾意躝街，又唔黐家，有一日返到屋企見到我阿爸阿媽突然間覺得好似『嘩！點解佢哋好似老咗好多咁嘅。』」她續說：「你哋如果咁細個就可以有呢一個諗法，咁你哋就有好多時間可以珍惜同屋企人相處嘅時間，係好正嘅。」
家怡讀書時的班主任亦有捧場，她笑言對方身兼訓導主任，表面嚴肅實質心軟，「因為嗰陣時我冇乜眉毛，我就畫眉返學，班主任見到我，都有嚟話我，佢話：『其實唔可以咁樣畫眉返學㗎喎。』我就同佢講：『唔畫好恐怖㗎喎！』哈哈。」她指班主任最終好好跟她商量，「佢話畫還畫，唔好咁深色。佢講嘅時候好似好嚴肅咁，但其實我覺得佢心裏面係好錫學生。」
家怡笑言這次謝票最大得着是「好想返番去讀書，好想由頭讀一次」，寄語師妹好好享受校園生活，「希望所有嘅師妹都可以識得咁樣諗，好好enjoy佢哋嘅學校生活。」
（點新聞特約記者陳惠芳報道）
（本文為作者觀點，不代表本媒體立場）
收藏
取消收藏
分享
