文/稀思路
中日關係緊張，都係日本首相高市早苗一手造成，佢除咗拋出「台灣有事即日本有事」嘅荒謬言論，仲想一步步推動日本軍國主義復辟，引嚟亞洲其他國家極大反彈。最近，稀思路睇到一單新聞，話日本嘅關鍵稀土釔（yttrium）將於幾個月耗盡，預計今年年底，就會出現短缺問題，中國外交部回應指，中方依法依規對日本實施出口管制，目的係制止日本「再軍事化」同擁核企圖。筆者覺得，依家日本嘅困局，要怪只能怪高市早苗了！
根據相關報道，日本官員同貿易公司高層就警告，如果中國冇增加供應，或者買家搵唔到替代來源，釔嘅短缺問題就會喺年底顯現，屆時將會影響到汽車、國防、晶片製造等行業，因為釔呢種金屬，對汽車甚至噴射引擎製造都至關重要。
報道仲指出，日本正尋求美國政府同多間美國大型企業協助，希望華府能促使中國放寬出口限制。日前，中國外交部發言人毛寧指，中方依法依規對日本實施出口管制，目的係制止日本「再軍事化」同擁核企圖。毛寧仲表示，中方維護關鍵礦產全球產供鏈穩定與安全嘅立場沒有變化，各方都有責任為此發揮建設作用。
之所以搞到今日嘅局面，筆者覺得，完全係因為高市早苗嘅言論同政策所致。佢上任首相冇幾耐，就作出錯誤嘅「台灣有事言論」，但事實係，台灣作為中國不可分割嘅部分，根本就冇日本嘅事。至於「再軍事化」問題，筆者一直觀察日本嘅右翼分子，包括高市早苗在內，佢哋根本就從未就日本侵華反省過，一味推動軍國主義復辟，甚至想威脅整個亞洲嘅安全。
雖然日本嘅製造業包括汽車業已經過咗發展高峰期，但汽車等重工業，仍然係日本國內嘅重要工業，如果真係出現稀土短缺，係有可能製造骨牌效應，令整個日本經濟都受到重創。日本想美國出手，促使中國放寬出口限制，筆者有個更簡單、直接嘅建議，就係高市早苗撤回不當言論，並且正式向中國作出道歉，糾正自己嘅錯誤。
如果讀者們有留意財經新聞，近期仲會發現唔少關於日本嘅負面新聞，日本政府想「救日圓」，甚至聯同美國出手干預，但日圓依然弱勢，睇最新嘅日圓兌港元匯價，日圓都只能勉強維持喺大約0.050港元嘅水平。一個國家嘅貨幣走弱，背後嘅底層原因，係因為呢個國家經濟唔掂，甚至其他地方對日圓嘅需求疲弱。現時嘅高市早苗，受到內外夾擊，而且經濟「沒有更差，只有更差」，仲搞軍國主義復辟，係咪想死多兩錢重呢？
對於中日關係，筆者認為至少有兩條日本絕對唔可以踰越嘅底線，第一條係日本要承認二戰時侵華嘅罪行，第二條係台灣問題屬於中國內政。高市早苗出任日本首相只係啱啱夠一年，就罔顧事實地挑戰中國底線，日本嘅企業可能會因為高市早苗嘅言論而當災，筆者覺得，如果日本企業、民眾都覺得高市早苗正在帶領日本走向深淵，應該多啲發聲，請走呢位「搞搞震，冇幫襯」嘅首相。
收藏
取消收藏
分享
