文/稀思路
近日，歐洲議會部分政客借「瑪格麗特·撒切爾獎」之名，將獎項頒予已被香港法庭依法定罪判刑嘅黎智英，甚至包裝出所謂「捍衛自由社會新一代領導人」嘅倡議。簡單嚟講，就係一班歐洲政客，將一個香港嘅重罪犯、國安犯，包裝成為「英雄」、「捍衛自由者」，但稀思路不禁要問，如果危害到國家安全嘅人係要「獲獎」，咁法國、意大利依家需唔需要頒獎畀喺街頭「打砸搶燒」嘅暴徒？做乜拘捕佢哋？
外國勢力嘗試捧高黎智英，唔算係咩新鮮事，但係將黎智英包裝成為「捍衛自由的人」，情況就明顯過分咗。首先一點，係黎智英唔係咩自由領袖，而係危害國家安全，佢確實係犯咗法，無論外界話佢係「傳媒人」、「自由倡議者」等等，甚至畀更多名目佢，都改變唔到佢犯法嘅事實。
睇返黎智英案件，佢分別被控兩項「串謀勾結外國或者境外勢力危害國家安全罪」及一項「串謀發布煽動刊物罪」，法庭將佢定罪、判刑前，經過156天公開聆訊，2,220件證物及8萬餘頁文件全面呈堂，14名控方證人當庭作證並接受盤問，855頁定罪判詞依據清晰。法庭亦明確指出，黎智英長期操控《蘋果日報》荼毒社會，勾結外部勢力，乞求對中國及香港特區實施制裁和敵對行動，目的在於損害國家同香港利益。
睇返黑暴運動期間，黎智英可以話係黑暴「最大推手」，經常利用其《蘋果日報》作為煽動工具，每逢香港有大事件，《蘋果日報》就用力煽動市民上街，甚至不斷美化暴力嘅犯罪分子；而且，黎智英更不時親身作出煽動行為，甚有想推倒特區政府甚至中央嘅意味。
黎智英被定罪，當中有一個重要犯罪行為，就係呼籲外國「制裁」香港。之前喺審訊時，案情顯示，2019年8月至2020年12月期間，黎智英曾利用其個人社交平台同《蘋果日報》等，請求外國「制裁」內地同香港特區官員，親自會見及聯絡當時嘅美國高官，包括時任美國國務卿蓬佩奧及蓬佩奧嘅時任女助理瑪麗基塞爾、美國前副國防部長伍夫維茲、前陸軍副參謀長基恩、前駐港總領事郭明瀚等等。
以法論法，黎智英嘅犯罪行為十分明顯，不容推卸，歐洲議會有政客授予佢「瑪格麗特·撒切爾獎」，筆者認為獎項嘅背後，其實係要捧高「反華罪犯」，繼而達致遏制中國嘅陰謀。如果真係客觀講法治，美國有國安法，英國有國安法，歐盟唔同國家都有保障國家安全嘅法律，黎智英假若去到英國而又勾結外國勢力損害英國利益，相信一樣會被告、坐監。
當歐洲議會政客吹捧黎智英時，筆者仲想問，歐洲各國依家嘅示威、破壞國家行為，係咪又要表揚一番？唔同國家嘅法律可能有所不同，但係當有人嘅行為超出法律界線，危害到國家嘅安全、影響其他市民嘅權利，無論呢個係傳媒人、政客定係商人，都一定要受到法律制裁；即使黎智英曾經十分財雄勢大，接受法律制裁係唯一合理結果！
收藏
取消收藏
分享
