文/稀思路
上星期，歐洲議會發表所謂「歐中政治關係報告」，當中主要內容，仲係繼續抹黑中國，包括香港特區在內。特區政府發出聲明作出譴責同有力駁斥，並促請歐洲議會立即停止詆毀香港發展、抹黑香港法治同人權等狀況。稀思路覺得，歐洲議會嘅干預，當中涉及兩大問題，第一係香港法治狀況良好，根本唔係佢哋所講嘅一回事；另外就係，依家歐洲自己都喺水深火熱之中，何來時間同心思，去干涉中國、香港特區嘅事務？
從報道可見，歐洲議會嘅涉華報告，仲有提及黎智英案，以及45人被定罪嘅串謀顛覆國家政權罪案件。老實講，兩宗案件，都涉及唔同程度嘅危害國家安全事件，例如黎智英案，黎智英講到明自己「為美國而戰」，而且唔止一次要求外國介入、干預香港嘅事務，作為反中亂港頭目，在法、理、情都應該受到嚴懲。
至於另一宗串謀顛覆國家政權罪嘅案件，如果之前有留意「非法初選」嘅顛覆案，都會睇到一班被告，講到明如果當選有機會喺立法會採取行動去癱瘓政府，戴耀廷更曾公開提到佢嘅「攬炒十部曲」，其中最後一步，更係針對住中央政權。換個角度，如果呢啲事情發生喺西方國家，被告會被「輕輕放過」嗎？筆者認為唔會。
其實，維護國家安全嘅法律，唔止中國有、香港特區有，西方國家包括歐洲唔同國家都有，美國嘅國安法律最多、最嚴苛，歐洲國家例如德國、意大利以至法國等，都有適應其社會環境嘅國家安全法律；當香港特區要執法，歐洲議會要求「放人」，唔單止係雙重標準，更係對香港法治嘅干預同踐踏。
最近睇歐洲新聞，仲會發現唔少歐洲國家，都陷於遊行、動亂以及內耗，例如喺法國，示威已經持續多日，多人被捕，而且有傳媒指連教師工會都將參與其中；而喺比利時首都布魯塞爾，亦有示威不滿政府緊縮預算，期間爆發警民衝突。現時嘅歐洲，正因為教育、公共財政等問題而陷入示威動盪，歐洲議會仲有閒情，去抹黑、干預香港事務？
回想香港2019到2020年嘅局面，再睇返今日香港嘅穩定，維持世界自由經濟體排名第一、跨境財富管理排名升上世界第一、世界競爭力排名第二、國際金融中心排名三甲等成績，換個角度睇，如果香港仲畀黑暴分子破壞，唔單止唔會有好成績，甚至連市民日常生活、基本出行安全都保障唔到。自己深陷動盪風波，卻叫香港特區政府「釋放罪犯」，歐洲議會嘅行為，實在相當諷刺。香港唔需要歐洲議會指手畫腳，如果歐洲議會嘅政客有時間、有心思，不如集中精力處理歐洲嘅種種問題，唔好喺度惹事生非！
收藏
取消收藏
分享
