文/稀思路
騙徒手法，層出不窮，喺黑暴運動期間，有個圈子叫「黃色經濟圈」，意思係「黃人光顧黃店」，既讓「自己人可以賺錢」，又唔會光顧「藍店」，但係喺呢班人入面，幾多人真係有所謂政治理念，幾多人其實係藉機會「搵食」呢？筆者唔太相信「黃人」，因為當中唔少人，係藉住反政府旗幟撈錢先真。最近，一單國安處拘捕行動就相當值得深思，今次涉及「黃色經濟圈」嘅，唔係食店、書店等，而係「賣保險」，呢個組合有啲奇怪，可能真係只有「黃人」先諗得出。
日前，警方國安處喺九龍區捕該一男一女，兩人均為38歲，涉嫌違反《維護國家安全條例》第24條「出於煽動意圖作出一項具煽動意圖的作為」罪。根據案情，兩名被捕人士包括一名持牌保險經紀嘅男子，喺唔同嘅社交平台上營運專頁，發布煽動他人對特區憲制秩序憎恨嘅帖文，被捕男子同時藉此銷售保險產品圖利。據悉，被捕男子係前本土組織「北區動源」創始成員黃嘉浩，被捕女子係佢嘅朋友，黃嘉浩喺唔同嘅社交媒體推銷保險之餘，多次發文鼓吹黑暴、聲援「手足」，甚至係宣揚「港獨」。
比較值得注意嘅係，喺香港國安法生效之後，有關專頁就轉咗用「軟對抗」嘅方式繼續反中亂港，將相關訊息以隱晦形式表達，同時又宣揚黑暴歌曲、「黃店」，企圖潛移默化荼毒社會大眾。
有消息人士指出，「黃色經濟圈」泛指2019年黑暴之後，一啲反中亂港人士發起所謂「手足」互相支援嘅經濟活動，實質係藉着煽動仇恨同「對抗」以斂財，危害國家安全之餘、損害香港經濟及繁榮穩定。香港國安法生效後，「黃色經濟圈」仍潛伏社區，並以「軟對抗」方式荼毒市民、牟取私利，對香港長遠穩定同繁榮發展埋下重大隱患。
以事論事，被捕人士最終會否被檢控以及罪成，要留待執法部門同法庭處理，但係相關嘅狀況，其實相當諷刺。當初由反對派政客煽動，一班「黃人」係要反政府，但事情一直發展，就有充滿「生意頭腦」嘅人，發展出所謂「黃色經濟圈」，喺政治、法治上，反對派全盤皆輸，但係有個別鼓吹「黃色經濟圈」嘅人，就一邊反政府一邊賺錢，變相地，「軟對抗」行動係綽頭，搵錢先係真嘅。
根據今次案情以及背景資料，被捕者最後點都要繼續查，假設警方或消息人士所講都係全部屬實，一邊反政府、一邊叫人買保險，確係比較少見，但筆者唔會感到驚訝。唔知讀者仲記唔記得，筆者之前就寫過歌手阮民安（Tommy），佢之前因為洗黑錢同煽動而被判監，佢嘅個案仲誇張，涉及用籌返嚟嘅錢去消費甚至賭博，刷新咗香港人對「黃人」嘅認知。今次案件，性質唔同，本質可能一樣，就係藉反政府言行「撈錢」。
除咗涉及生意、「撈錢」，筆者覺得今次案件要警惕之處，在於雖然黑暴運動已經失敗告終，仲有人借「黃色經濟圈」搵食。最令人心寒嘅，係煽動以至黑暴等訊息，仲有人喺有意無意之間散播，可以係語帶雙關嘅內容，又可以係借一啲歌曲去播「獨」，手法令人防不勝防。除咗執法部門要繼續執法，社會各方都要多加留意，唔好畀身邊嘅年輕人、學生，再受到「看似無害」嘅煽動勢力唆擺，直至今日，依然有參與黑暴、攬炒罪行嘅青年在獄中，我哋唔好再畀下一代受到反對派、攬炒派所煽動！
收藏
取消收藏
分享
