文/稀思路
近日，稀思路喺網上見到一則網文非常有趣，話說，一名移英港人喺社交平台發文、吐苦水，分享自己喺英國遇到惡鄰居嘅遭遇，本身都係想圍下爐、取下暖，等啲人安慰或支持下佢，點知就引來一班「英衛兵」留言猛力批評，搞到樓主無奈地表示，次次有移英港人分享生活困難，都有人出來認叻，話自己喺英國「全家都過得好幸福」，認為呢種回應無價值、壞心腸。筆者就覺得，大家成日講言論自由，依家喺咪講喺英國生活唔好，都係一種「罪」？
其實，樓主發文只係想紓發下情緒，「當你覺得點解自己咁倒霉遇着咁嘅事、唔知點樣處理為之最好，聽到同樣有類似問題的人講番他們的經驗係會有幫助」，不過事與願違，每次有咁嘅情況，換嚟嘅卻係「英衛兵」嘅攻擊，喺咁嘅情況下，難怪有網民笑稱，「因為唱衰香港係呢班盲反loser唯一心靈寄託」。
關於英國嘅問題，過去幾年重重複複，由經濟到治安，再由治安到生活環境，都有唔同人表達過佢哋嘅想法，例如最近，就有人憑住自己嘅經驗，總結出有8類人唔適合移居英國，包括：
1.覺得得香港好好：你嚟到只會日日掛住香港，繼而變做怨婦，甚至抑鬱；
2.懶：唔想學新嘢，唔想自己整，唔想做家務煮飯，指當地生活要靠自己，缺乏香港的方便與高效率；
3.習慣出街食飯：呢到就算你有錢叫外賣，叫得多你都唔會想再叫，最終仍需靠自己煮食；
4.不肯考取車牌：有人肯車出車入另計，就算住倫敦都有啲地方揸車去係方便同快好多；
5.驚青同有被害妄想症：成日覺得自己比人歧視，出個倫敦都「驚到瀨屎」嗰類人真係唔太啱；
6.好怕悶，唔同人交流唔得：個個都忙住自己生活，返工做家務煮飯接送番放學。唔係成日都會有人同你傾計講心事。講完都要驚佢轉個頭會唔會同其他香港人講返；
7.家庭關係唔太健康：每個人都要重新適應，每個人都有自己壓力，好多時候少少嘢都會爆煲繼而分開；
8.物慾太強：好鍾意東亞地區買嘢追星、飲食嘅人，除非真係有錢到可以成日上網買嘢比運費或者自己飛嚟飛去，如果唔係呢到唔會滿足得到你。
有人話呢8點，完全講中移英港人嘅心理，其實關於移英問題，仲有唔少，例如最基本嘅錢同英語水平問題，英國人歧視外來人、當地治安等等。如果要集中講呢8點，筆者覺得比較致命嘅一點，就係「悶」，喺香港生活，多姿多采，喺居住範圍20至30分鐘車程內，會找到唔同娛樂活動，包括行山，而且無論居於港九、新界，要即日約朋友聚會，都係話咁易。人離鄉賤，去到英國，錢緊張咗，職位低咗，朋友少咗，娛樂活動又減少，點搞？
喺移英原因中，唔少港人都話為下一代、為教育，但筆者聽過唔少故事，有部分人嘅子女，其實唔係好適應到英國學校嘅生活，甚至埋怨父母點解要帶佢哋去一個陌生地方。對於「英衛兵」而言，表面上佢哋可以講到「英國係全世界最好嘅地方」，但有個可能性，係佢哋網上面力撐英國，另一面係內心不斷埋怨。某程度上，移民係一場近乎all in（全力下注）嘅遊戲，但all in之後，可能得nothing（什麼也沒有）。
收藏
取消收藏
分享
