文/稀思路
睇返過去一段日子嘅文章，原來稀思路不斷評論國際時事，已經有好一段日子冇寫英國，係時候都講下英國以至香港嘅近況。最近，就有人喺社交平台發文，話有人移居英國後，又回流香港，點知返到香港，人到中年，竟然搵唔到工，全家陷入經濟困境，呼籲同路人「回流香港，真係要三思」。但事實係咪咁呢？從網民回應以至經濟數據，稀思路可以肯定地話畀讀者聽，香港比英國好得多！
有人可能出於崇洋心理，總係覺得「外國月亮特別圓」，但事實係另一回事，例如發文者叫人「回流要三思」，喺發文下面就一個又一個留言反駁佢，例如有人話有親戚回流無耐，兩星期就搵到工，仲係做返本業嘅會計師。亦有網民指出喺香港，做外賣、做司機等，都唔會搵唔到工。當然，亦有留言繼續踩低香港，但筆者認為，喺香港「搵唔到食」，呢個講法未必符合現實。
筆者最鍾意就係睇數據，當有人又要用英國同香港嘅生活環境嚟做比較時，不如先睇下兩個地方嘅失業率。根據最新數字，香港嘅最新失業率，係3.7%，雖然失業人數有所增加，但3.7%嘅失業率，喺已發展地區嚟講，肯定係一個相對低嘅數字。
至於英國，第二季失業率為4.9%，較之前一季低「0.1%」，一個約數，就係英國大約有5%人失業，而且私人機構薪酬只增長2.8%，創下自2020年10月止3個月以來最弱增幅。再睇多一組數字，今年第一季，香港GDP增長有5.9%，而英國首季嘅GDP增長，係只有0.6%，但呢個數字已經叫做「符合市場預期」。
無論喺香港定英國，會唔會有人搵唔到工？一定有，但睇經濟數據，香港就算唔叫「碾壓英國」，至少各項數據都比英國好，失業率以至GDP增長，都係值得參考嘅指標。喺人工智能時代，整個社會都要面對新變化，傳統崗位好難避免唔會受到衝擊，但係睇大環境，香港一定比英國好。
至於「黃絲」們最關心嘅政治問題，其實喺香港，唔同嘅法律係針對犯咗法嘅人，包括要推倒、顛覆政府嘅人，普羅大眾除非錯信政客而走上違法抗爭之路，否則香港嘅法律，其實係保障緊絕大多數市民嘅安全同福祉先真。反觀英國，商舖會無端端有一班人衝入去「任搶」，行街畀人打劫但警察好似唔想捉賊咁，邊個地方生活得更安全，都係有眼可見。
移唔移民，回唔回流，從來都係個人選擇，但講到英國比香港好，抱歉，筆者完全唔認同！
收藏
取消收藏
分享
