【點新聞報道】真係好無德行！有港男日前在社交平台發文怒斥，有殯儀公司早上將喪禮祭品送抵歌連臣角後，因無人看守而遭人全數取走。網民對此感到極度憤怒。直指缺德折壽「好偷唔偷，偷先人啲嘢？要折壽㗎喎」、「7月14先嚟偷，祝佢好運」。
該港男於社交平台threads以「偷祭品」為題發文，怒斥「簡直係黐X線，邊X個咁XX街，喺歌連臣角偷祭品」。他表示，近日籌辦喪禮祭祀先人，殯儀公司將祭品送抵歌連臣角，因為早上送，沒有人看守，祭品被人取走了，「係殯儀公司打電話嚟通知我，再加whatsapp話唔好意思啲祭品畀人偷咗」。樓主惟有冒雨重新購置祭品，「我而家冒雨衝咗出去買」。
樓主從殯儀公司傳給他的照片推測，好多間殯儀公司/石廠都係喺同一間到訂祭品+附薦包 一朝早送到去歌連臣角，每一個裝有祭品嘅紙皮箱，都有貼上印有殯儀公司名或者師傅名的A4紙，附薦包亦一早已經寫咗先人名及日子，因為是之前預訂的。
樓主認為事件與職員或清潔姐姐無關，「邏輯推算應該就唔關啲職員、清潔姐姐事，佢哋今日個個都好nice好好幫手」，又說「我呢間殯儀公司算係咁，佢冇收我祭品同附薦包嘅錢，佢哋自己硬食咗」。
帖文引起網民熱議，「祭品都偷......痴9線」、「好黐線」、「好偷唔偷，偷先人啲嘢？要折壽㗎喎」、「先人會問佢攞返啲嘢，仲要加碼賠償」、「7月14先嚟偷，祝佢好運」。有網民建議報警處理，「有CCTV可以報警等警察搵職員睇CCTV」、「呢d地方人流少。要查一陣都睇到。睇有冇心查」、「希望殯儀公司跟進，睇下有無cctv片可以放出黎睇下」。
另網民分享同類被盜祭品的經歷，「早幾個月曾咀探我老豆同嫲，樓上樓下各擺咗一盒飯同飲品，化完寶想上去同佢哋講多兩句嗰陣發現呀嫲盒雞飯比人偷咗去後面兩排人地個先人位到，個飯盒有印字所以我唔會認錯，真係乜嘢人都有」、「經典得過做緊法事途中，有人經過身邊，轉過身成條燒肉俾人拎走咗。其實嗰壇法事係會請到『各方好兄弟』，真係夠沙卜」、「呢樣我試過係接近$500嘅玉扣金銀紙第二朝返去發現俾人偷咗，你間殯儀公司有講句唔好意思都還好，我用嗰間勁冇禮貌仲要喺度講大話，態度差到好似我欠咗佢咁。」
收藏
取消收藏
分享
