文/稀思路
因為煽動顛覆國家政權罪，「支聯會」、李卓人同鄒幸彤經審訊後被裁定罪名成立，而何俊仁就一早認罪，各被告會喺今個星期五求情。一宗香港國安法案件，案情、罪證等，全部清清楚楚，一班「以顛覆為己任」嘅政客，不斷煽動其他人去反對甚至顛覆國家政權，罪成十分合理，甚至唔少評論話係罪有應得；偏偏，一啲外部勢力就好似「唔干預唔得」咁，竟然要求特區政府「放人」，筆者想問，有人犯法，政府就要執法，放咩人？
一如所料，喺「支聯會」案宣判後，一班外部勢力就急不及待地「排住隊」干預案件，英國、美國、歐盟等，都發表所謂聲明回應裁決，仲要求特區政府、法庭要「立即釋放相關人士」。對於外部勢力嘅所謂回應，其實就係赤裸裸地干預香港嘅司法案件，做法不符國際慣例，亦不符法治原則。同樣重要嘅係，外部勢力喺度顛倒是非！
睇睇法庭喺「支聯會」案嘅裁決理由，有理有據，亦完全符合法治原則，例如，法庭判詞就指出，喺香港國安法實施後，「支聯會」、其他被告嘅所支持嘅綱領，抵觸國家憲法，係想顛覆國家政權；而喺呢過程，被告知道自己言行可能已經超越合法表達自由範圍，但佢哋冇理會。即係，明知行為可能違法，但硬要繼續，結果如今要承擔罪責。
外部勢力要干預案件「永遠說得漂亮」，但我哋可以向外部勢力提出嚴肅嘅問題，如果有人喺外國煽動顛覆政權，以至係煽動、參與「抗爭」，會有咩後果？因為「自由」，所以無罪釋放？筆者睇嚟唔會，之前發生喺西班牙加泰隆尼亞嘅「獨立」事件，失敗之後，一眾主事者被重判。發生喺美國嘅國會山莊暴動，亦有人被重判十幾年。講下英國，除咗國家安全法越來越嚴，之前面對暴力示威，仲玩埋「加快審訊」。相比之下，香港執法部門、法庭做事，公平公正又公開，外部勢力憑什麼去干預？
講到底，外部勢力就係雙重標準，如果顛覆、「獨立」以及暴力抗爭發生喺自己地方，就「打到手軟」為止；發生喺香港特區，就會毫無保留地支持香港嘅反中亂港勢力，將法律同是非顛倒。之前，美國時任眾議院議長佩洛西，喺黑暴發生時，話香港出現「一道美麗風景線」，結果到美國國會發生暴動，據報佢自己辦公室都畀人破壞。對於外國政客嘅言行，以及佢哋得到嘅「反饋」，難道稀思路又要講句美國出現「一道美麗風景線」？
己所不欲，勿施於人，美西方國家都唔想自己國家被破壞，點解要放縱、支援想攬炒香港嘅組織同政客呢？事實唔會呃人，正因為中央喺危急關頭制定香港國安法，香港先止暴制亂，再為之後發展提供安全根基。如果唔係有一系列維護國家安全法律，香港點做全球最自由經濟體？點樣可以連續多季實現經濟正增長？從法律角度，「支聯會」必須承擔罪責！從安全角度，「支聯會」危害國安！從發展角度，如果「支聯會」等亂港組織仍然存在，始終係社會禍根，仲會荼毒我哋嘅下一代。外部勢力喺干預香港事務前，請先認清事實，唔好雙重標準！
收藏
取消收藏
分享
