文/稀思路
香港人講嘢，有時係相當風趣嘅，例如係「吊頸都要抖氣」「打完齋唔要和尚」等等，一般生活喺香港又有咁上下學歷，唔會窮得去邊，但有時啲人形容自己銀包冇乜錢，就會話自己「窮到要賣血」，呢句說話絕嘅地方，在於原來喺發達國家，真係有人要去賣血換錢，而且係全球經濟總量最大嘅國家——美國，到底發生咩事？
有美媒就報道，喺物價飛漲、油價高漲而且社會福利被削嘅情況下，美國嘅低收入家庭深受打擊，甚至出現生存危機，有調查顯示大約三分之二嘅美國人難以負擔食品雜貨價格；如果計年收入低於5萬美元嘅低收入家庭，表示食品價格難以負擔嘅比例，更超過八成。
喺呢個「嘢食都買唔起」嘅情況下，就有人選擇「定期賣血」。喺俄克拉何馬城，44歲嘅古德曼，存款唔夠一美元，每周要賣兩次血漿；本來，呢位女士依靠接近300美元嘅食品券維持基本生活，但因為食品券唔能用喺購買廁紙或女性衞生用品，所以只能依靠教堂接濟，佢甚至表示自己從來冇去理髮店。
另一位「長期賣血」嘅美國人羅德里格斯，一樣係每星期要賣兩次血漿，悽慘嘅地方在於，佢每次賣完血，返到屋企時虛弱到連人都企唔穩，但為咗生存，佢根本別無選擇！
以我哋常人嘅認知，美國係世上經濟總量最大、有錢人最多嘅國家，當有巨富靠科技賺咗其他人「一百世都用唔完嘅錢」時，美國竟然有基層要「賣血維生」，筆者覺得已經唔能夠單單用貧富懸殊去形容，應該話，美國係一個病態社會先真。
令人更愕然或憤怒嘅地方，在於喺美國基層掙扎求存嘅時候，美國政客卻係「賺到笑」，除咗早排有廣泛報道指美國總統特朗普身家暴漲，近日又有新聞指出，喺特朗普第二任期內，至少有57名任命官員，身家達到一億美元或以上。筆者唔敢講美國政府官員「肥上瘦下」，但身為父母官，自己「富到流油」，基層卻要賣血維生，實在可悲。
筆者唔想去攻擊美國嘅民主制度，但如果一個制度、一個政府，佢嘅政策係會令「貧者越貧，富者越富」，甚至會走向極端，情況係咪理想呢？之前筆者喺網上睇過一條片，繁華嘅美國城市，向城市中心外稍稍移步，就全街都係露宿者甚至吸毒者，再睇睇美國官員、巨富嘅生活，呢種落差，實在教人唏噓。
收藏
取消收藏
分享
