文/稀思路
喺伊朗嘅追殺名單上，美國總統特朗普毫無疑問係「Number One」，特朗普自己喺回應有關事件時，都不時表示伊朗想殺佢，但就表現出一副「我唔怕」嘅姿態。但怕與不怕，唔係剩係得把口，而係睇實際行動嘅，最近，特朗普上演咗一幕「偷龍轉機」，更疑似搵記者擋子彈，到底係佢本人怯，定係美國軍方驚自己總統被暗殺？
話說，特朗普前排喺土耳其，登上由波音747客機改裝嘅舊版「空軍一號」專機後，由停喺飛機另一邊嘅餐車秘密接走，送到由波音757客機改裝、較細嘅C-32A行政專機離開，前往英國，再轉坐新版「空軍一號」離開，飛返去美國。咁舊版「空軍一號」有咩用？就係用嚟做餌，咁樣可以有效避開伊朗嘅暗殺威脅。
睇完呢個故事，相信聰明嘅讀者都會估到，倘若、萬一、如果舊「空軍一號」成為襲擊目標，特朗普唔會有事，因為佢本人已經唔喺客機，但係喺舊「空軍一號」嘅記者等，就要幫特朗普擋子彈，Sorry，嚴格嚟講，喺擋炮彈先啱，特朗普、軍方以至特勤局咁做講唔講武德，讀者們可以好好判斷。
根據特朗普本人嘅講法，佢話自己係遵循特勤局及軍方安排，因為佢哋希望特朗普改坐不同航班及飛機，特朗普仲話安全性其實都係一樣，但佢照安排做喇。筆者唔明白，如果安全性都係一樣，咁其實特朗普係冇轉機嘅需要。美國軍方、特勤局要安全，大家都理解，但瞞騙傳媒兼有擋子彈疑雲，似乎就講唔過去。
美聯社記者布蘭登有隨同特朗普訪問土耳其，佢話喺登機回國前，拍到餐車停泊喺「空軍一號」旁邊，形容當時情況唔尋常，佢仲表示自己喺美聯社工作咗20年，之前採訪過其他總統，都未見過發生咁嘅事；亦有隨行記者不滿，竟然喺唔知情情況下，幫特朗普擋子彈。
其實，喺2000年，時任總統克林頓出訪巴基斯坦，都試過冇坐專機而揀咗坐另一飛機，以免成為恐襲目標，但同特朗普做法唔同，克林頓抵埗時，公開從該架普通飛機現身，白宮事前亦私下知會白宮記者協會主席。筆者就覺得，今次事件唔只係安全問題，而係溝通同通知問題，美國記者如果事先知道事件，可以決定是否要繼續隨行，但如果乜都唔知，可能真係死咗都唔知咩事，難怪外媒會發炮批評特朗普政府。
今次事件，更深層次嘅問題，仲在於美國政府包括軍方，真係多多少少有啲怕伊朗，怕伊朗一個回馬槍，就趁特朗普喺土耳其起飛後襲擊「空軍一號」。世上最強大嘅國家，依家總統坐飛機都要因為安全而搞一輪大龍鳳。依家，美以伊戰爭出現拉鋸狀態，又有消息傳出美國最新策略係傾向經濟施壓多於軍事打擊，加上特朗普「偷龍轉機」避開襲擊，戰果已經相當明顯，伊朗並無戰勝，只係開始「拖死」咗美國以及其盟友，美國幾個月嘅軍事行動，換來嘅結果，就係賠了夫人又折兵。
收藏
取消收藏
分享
