【點新聞報道】酷熱天氣持續，暑氣逼人，戶外工作者尤感煎熬。有外賣員開心分享暖心經歷，表示送外賣到石峽尾邨一公屋單位，有婆婆見他汗流浹背，就捉着他的手硬塞了20元小費，「婆婆仲有能力畀到，你收咗佢啦。」樓主感到十分窩心，「送咗咁耐外賣，真係覺得住公屋嘅街坊特別有人情味」。
該名外賣員在fb專頁「KeeTa外賣關注組」發文分享婆婆的慷慨善心，「送咁耐外賣，真係覺得住公屋嘅街坊特別有人情味。剛剛送完一單，婆婆見到我流晒汗，收到外賣之後捉住我隻手，夾硬要畀小費我。」
樓主婉拒婆婆表示，「唔使啦婆婆，我喺附近過嚟咋！只係今日比較悶熱，我又比較容易出汗」。婆婆暖心地表示，「唔緊要啦，我見你真係好辛苦，婆婆仲有能力畀到，你收咗佢啦。」說完就慢慢地關上門。
一件小事都可以很開心，樓主表示，之前每逢大雨或者酷熱天氣，送公屋單的時候，「好多街坊見到我流晒汗送上樓，有時會遞包凍飲、一句『辛苦晒』，甚至給少少小費」。他感恩表示，「雖然可能只係一句簡單嘅問候、一包飲品，但對我嚟講真係好暖心同好大動力，多謝你哋」。
帖文引來網民大讚，「老一輩捱得多，知生活唔容易，有機會畀啲鼓勵人，都會願意畀」、
「應該唔關公唔公屋事，係老人家很講究貼士禮儀，就好似去飲茶，有能力個班長者，去到酒樓會派利是俾侍應一樣，後生嘅好少會畀」、「我收過幾次50蚊都係公屋客」、「反而所謂有錢人的私樓豪宅，毛都無條。」
另有外賣員分享暖心經歷，「我都試過，送到之後公屋婆婆要比貼士，同佢講唔使啦，提佢APP入面已加左貼士，我驚唔係佢本人落單有誤會，婆婆話佢知道，叫我收啦，辛苦晒！心都暖埋」、「每逢大雨必定會俾tips，上次轉黑雨前個外賣員踩單車送到黎成身濕晒，佢仲要不停講唔好意思遲左，其實真係唔洗唔好意思，安全最緊要」。
（本文為作者觀點，不代表本媒體立場）
收藏
取消收藏
分享
