文/稀思路
如果讀者最近有留意美國同伊朗嘅新聞，唔難會發現一件事，就係形勢對美國越來越不利，媒體不斷報道美國啲彈藥用得差唔多，美國總統特朗普雖然想否認，但又一邊表示要「捉內鬼」。最近消息，係美國政府正希望低調處理伊朗問題，可能會採用經濟施壓而非軍事行動，意味特朗普對伊朗嘅軍事行動，敗象已呈。咁點算，好簡單，搵另一個新目標——格陵蘭島，轉移下視線，問題就解決喇！
說時遲，那時快，美國企業已經悄悄地喺格陵蘭島有所行動，據報與特朗普有一定關係嘅美國「格陵蘭能源」公司，已經將鑽探設備運至島嶼東部嘅詹姆森地港口，準備開採石油。「格陵蘭能源」聲稱，詹姆森地下方可能蘊藏價值高達1萬億美元（約7.8萬億港元）嘅原油，該公司將投入6000萬美元進行勘探。
喺未經人哋國家、地區批准嘅情況下，外國企業自動搬開採設備準備開工，呢種做法真係可以話係奇聞。格陵蘭自治政府就發出嚴厲警告，講明從未批准相關設備登岸，要求後續所有事宜，都必須事先獲得自治政府礦產資源管理局批准，但就暫時未要求涉事美企運走設備。即使美國企業係透過同本身有油氣勘探權嘅英國公司合作，都要得到格陵蘭島當局批准，即係話，美國企業嘅行為，完全非法！
正常嘅美國企業，就算惡慣、霸道，都冇可能敢踩入人哋國家直接開採，點解「格陵蘭能源」咁大膽？有報道指出，「格陵蘭能源」公司嘅高層、股東，向來「同特朗普都有啲交情」，今年4月，共和黨金主就購入「格陵蘭能源」部分股份；6月，就有美國海軍退伍軍人加入「格陵蘭能源」董事會，呢位美國海軍退伍軍人，佢創立嘅國防科技公司，就係研發緊特朗普要搞嘅「金穹」導彈防禦系統。一班相當有背景嘅美國商人，喺格陵蘭島作出相當大膽嘅行為，成件事即刻明白晒。
呢件事，稀思路覺得可以用兩個層面去睇，第一係美國完全唔放格陵蘭島甚至丹麥在眼內，丹麥作為北約成員國，打埋算盤都可以話係美國半個盟友，美國企業嘅行為，講得直白啲，可以話係強搶，美國企業呢波操作，可以話係將北約、丹麥以及格陵蘭島踩在頭上，沒有最過分，只有更過分。
第二個層面，就係美國內部嗰套金權政治，之前已經有資料披露過，特朗普第二次成為美國總統期間，財富大漲，就算特朗普話財產由家族等處理，佢資產大增嘅原因，大家都心知肚明；如今，同共和黨甚至特朗普本人有關嘅企業或商人自動踩入格陵蘭島，有冇得到特朗普或特朗普親信嘅支持，相信都唔難估計。
喺國際關係上，全球唔同國家都明白講到底，國際舞台就係講「邊個拳頭大」，但拳頭大還大，都要講下武德嘅，特朗普想搶格陵蘭島全世界都知，但如果人哋唔賣，特朗普都唔可以迫，亦唔應該直接、間接鼓勵或默許美國企業去格陵蘭島「自動開採」。其實，美國喺伊朗嘅敗局，已經證明咗世界再唔係美國可以任意妄為，如果美國再因為格陵蘭島問題而同北約其他成員硬撼，美國喺呢個世界上，仲會剩返幾多盟友？「溫水煮蛙式」慢慢佔領格陵蘭島，筆者估計係「行唔通」！
收藏
取消收藏
分享
