【點新聞報道】一連四場長壽音樂劇傳奇《我們的青春日誌》，昨晚（6日）於葵興爆炸戲棚劇場開鑼。英皇歌手黎展峯（Andy）獲英皇集團主席楊受成「欽點」擔任男角之一Alex，首度挑戰音樂劇即擔大旗。Andy坦言緊張到「食唔安坐唔落」，更自爆完騷後望見全場觀眾一刻，當場嚇親！
音樂劇導演Tom於謝幕時大爆選角經過，原來他在港台頒獎禮後台，無意中聽到Andy的現場演唱，驚覺其聲線極具潛力；其後機緣巧合下，他膽粗粗向楊受成「開口要人」，他二話不說即時首肯，直接欽點Andy上陣。Andy事後得知真相，笑言：「上年出歌搵老闆拍宣傳片，求佢講句『巴閉』已經開心到震；而家知道係老闆親自揀我，呢個『欽點』故事，真係仲巴閉過佢親口講！」
首次踏足音樂劇舞台，Andy直言壓力全來自「要做好十足準備」的性格：「我係嗰種要綵排到滾瓜爛熟先有安全感嘅人，今次真係畀咗好大壓力自己。」談及最大挑戰，他笑指非跳舞莫屬：「我手長腳長，自問跳得唔好睇，經驗又少，好彩角色Alex性格內斂，動作唔大，總算夾到。」他更打趣道：「看來我要認真搵老師惡補！」
至於首晚有否「蝦碌」？Andy坦言最難忘反而是謝幕一刻：「演出時台下全黑，乜都睇唔到，直到完場燈光一開，先發現坐滿咗咁多觀眾，真係嚇一嚇，個樣應該即刻變返『Alex式』怕醜。」他又感謝幕後及台下觀眾的掌聲。
（點新聞特約記者陳惠芳報道）
（本文為作者觀點，不代表本媒體立場）
收藏
取消收藏
分享
