【點新聞報道】有應屆DSE考生因父母拒絕支付120萬元英國升學費用，在社交平台Threads發文公審，寫道「好恐怖，點解想去英國讀大學都可以畀阿爸阿媽鬧，明明手續同價錢都合理，係咪自己的事自己做會好啲？」帖文旋即掀起網民兩極反應。
樓主透露，其實中三開始（2021）就已經下定決心要去外國讀大學，苦等咗幾年已經有啲辛苦，屋企人答應讓他到外國升學，最終因細佬的國際學校監護人問題而取消，「屋企人喺我中三嗰年話可以去外國讀大學，而前排其實考慮過全屋移民去波蘭（我細佬讀國際學校冇監護人問題取消），我先會咁樣提出。」
樓主最後選定到列斯（Leeds）升學，預計約120萬港元便能完成一年基礎課程及三年學士學位，「我揀咗英國比較平嘅城市『列斯』，多香港人+適合。有bno嘅加持令簽證比較容易，計落1 year prepartory course + 3 years major大概120萬，價錢比之前考慮過嘅波蘭差唔多」。樓主並打算入籍英國，「同埋讀大學嘅時候，順便坐埋六年攞citizenship。發現唔適合都可以返嚟香港打工。」
然而，當樓主向父母提出計劃時，卻換來嚴厲指責，指父母對歐美極度反感，「佢哋鬧得好難聽，其實屋企負擔到，但係佢哋反應咁大真係有啲悲哀」。樓主不甘地表示，「其實小弟我計過數係完全負擔到，但係有可能佢哋視讀大學為一個投資，覺得喺香港讀都係一樣學位...但係我想試吓另外一種生活方式」、「我都係衡量一下屋企經濟狀況，又唔係偷錢」。
帖文引起網民兩極反應，有人認為出國留學絕非小數目，「自己人生自己負責，你自己出錢先有資格講合理」、「你有能力唔使攤大手板問人攞錢的話就啱，邊個比錢邊個大哂」、「你幫你屋企計數，你講得呢句真係好恐怖」。
有網民認為樓主已成年人，應為自己負責，「你滿18歲，父母撫養你嘅法律責任已經完咗。屋企嘅錢係你父母辛苦賺返嚟嘅私人財產，佢哋鍾意點用就點用，完全同你無關。你幫屋企人哋計定錢去讀書？父母舊錢冇義務留畀你。想去英國？自己賺錢去，唔好老奉當父母係你嘅自動提款機。」
另有網民留言鼓勵樓主，「攞到獎學金嘅話就唔使睇佢哋面色，加油」、「真係想去外國讀，可以自己儲錢master去外國讀」、「當年我都放棄咗英國大學offer，喺香港讀2年、一路落嚟儲錢同攞獎學金轉去美國讀書」、「真心建議你可以自己儲錢master去外國讀，master讀1-2年負擔細過bachelor好多，而且bachelor成績好會有資助」。
收藏
取消收藏
分享
