文/稀思路
今屆世界盃雖然已經曲終人散，但爭議仍然持續，由參賽隊伍擴充、動態門票價格（唔少人話炒貴晒啲門票）以至飲水廣告時間等，整個世界盃，商業味道極為濃厚，已經令FIFA主席恩芬天奴（Gianni Infantino）受到質疑；可能見自己商業化成功，恩芬天奴食髓知味，竟然想成立子公司營運世界盃同出售股權，搞到足球界震怒要踢走佢。但最有趣嘅係，有傳媒指恩芬天奴曾經想向美國總統特朗普求救而「不得要領」，好有可能，恩芬天奴已經成為特朗普棄用嘅「安全套」，認真陰公。
根據《紐約郵報》幾日前引述嘅消息，恩芬天奴曾經搵過美國國務卿魯比奧，但魯比奧否認有通話；另外又有消息指，其實恩芬天奴曾經打過電話畀特朗普，但一樣未能成功。恩芬天奴嘅諗法，就係覺得自己被傳媒猛烈攻擊，又被孤立，所以想搵「盟友」幫手支持自己，但美國政客呢，你如果冇價值，真係睬你都傻。
可能讀者會有「十萬個為什麼」，恩芬天奴自己想將世界盃賽事變成子公司或股權賣出去，成件事關特朗普咩事，點解要搵特朗普幫佢拆彈？問題核心，在於恩芬天奴同特朗普家族關係密切，佢計劃中預定會投資嘅主要公司，係包括由特朗普女婿庫什納弟弟創立，所以依家出事，恩芬天奴就想搵特朗普幫拖，而因為呢一層關係，外界更認為恩芬天奴與特朗普家族有利益輸送。
任何問題，我哋都可以嘗試還原基本步，諗下事情到底係點。由今屆世界盃開始前，基本上外界就質疑，動態門票機制、建立官方二手門票轉售市場等，已經將世界盃商業化；加上比賽中間嘅飲水廣告時間，如果恩芬天奴話呢啲措施係增加FIFA收入繼而投入足球推廣，姑且當恩芬天奴講得通。但依家情況完全唔同，係恩芬天奴想將整個世界盃賽事等「外包」出去，完全將世界盃變成大生意，足球界好難唔反對佢。
睇返反對恩芬天奴嘅國家或地區，歐洲足協力量最大，據報歐洲又同亞洲足協、中北美洲同加勒比海足協組成反對聯盟，如果反對聲浪持續，恩芬天奴下台係最有可能嘅結果。筆者覺得，恩芬天奴有兩大敗筆，第一係錯判形勢，以為世界盃就係「賺錢、賺錢同賺錢」；第二係搵錯拍檔，特朗普係有權力，但係特朗普幾時有當佢係真朋友？加上佢靠攏特朗普，歐洲等國家相信會幾不滿，一個站在世界球壇頂峰嘅人，原來係欠缺政治智慧嘅。
成件事，有可能係恩芬天奴想賺錢，又想帶挈特朗普家族賺錢，如果真係有錢賺，特朗普就當恩芬天奴係朋友；如果失敗，最好就唔好燒到特朗普。喺政治以至商界世界，往往就係殘酷無情，利用價值壓倒一切，世界盃期間，恩芬天奴同特朗普老友鬼鬼，依家恩芬天奴玩大咗，以美國嘅「老大哥」心態，梗係要啲小弟自己受返啦。筆者想安慰下恩芬天奴，無事嘅，如果將來事業仲會有起色，首先係唔好太貪心、急進；其次就係，識朋友要小心啲，只要睇下歷史，就知道美國出賣過幾多盟友、朋友啦！
收藏
取消收藏
分享
