【點新聞報道】家用問題是常見的家庭矛盾導火線！一名剛大學畢業並找到工作的港女，計劃獨立搬出來自住，爸爸得悉後要求「交家用先可留住細房」，然而細佬卻不用交家用兼有零用錢。不少網民批評爸爸重男輕女。
一名爸爸在社交平台threads以「原生家庭仔女長大」為題發文，家中一仔一女，家姐今年大學畢業已搵到工作，細佬則正讀大學Final Year，他們各自擁有自己的房間，家姐的房間比細佬大10呎。樓主透露，畢業前家姐自己努力搵錢，亦有比家用；細佬在家無所事事，但兩個都同樣獲發零用錢。家姐認為不公平，覺得細佬「乜都冇做」有零用錢，自己出去努力搵錢，而要畀家用覺得委屈，故決定「搬出去就自己搵錢自己用」。
於是樓主與太太各有一個想法，樓主：「（實際啲）同家姐講搬咗出去，佢間房細佬會用，而家姐啲嘢搬會返入細房，如果仲有畀心意（家用）父母，可以繼續擺嘢喺細房，否則搬出去三個月之後將會清房。如果日後想搬返嚟嘅話就將會住細房。」至於太太：「（情感上）同家姐講搬咗出去我哋會好掛住佢，會唔捨得佢，喺屋企可以日日見面，搬走咗就難再見，希望佢唔好搬走。」
樓主進一步指出，「事實上空間係緊迫嘅，細佬間房只係得上床下書枱，家姐間房除咗張床仲可以擺多個衣櫃同書櫃，當然如果細佬唔需要家姐間房就冇問題，只不過細佬而家仲有一年就畢業，佢比較倚賴性高，應該冇咁早搬出去」。
樓主擔心將來會發生拗撬，故希望在家姐搬出去之前先講清楚，「係驚到時佢（細佬）出嚟做嘢有畀家用情況下要求家姐間大房，而當其時因為家姐搬咗出去，我唔需要家姐畀家用嘅時候，我就好難拒絕細佬要求，到時如果家姐又唔返嚟執嘢，細佬有機會求其處置佢啲嘢，棧到時發生拗撬，與其係咁，我諗早啲喺家姐搬出去之前同佢講清楚先會好啲。」
不少網民狠批爸爸的做法，等同逼走個女，「就算係父母都唔應該，非常唔尊重」、「完全唔明白點解可以對個囡咁harsh，對個囝就咁遷就」、「慶幸我冇呢啲想法嘅父母，啲真係難聽過粗口」、「咩年代仲重男輕女，以前啲大戶人家都算，窮Ｘ廢老有啲乜好繼承，繼承呢啲弱智思想？」、「邊個話21世紀冇招娣… 」、「就算係，等細佬畢業要求時，先再算，不適合而家講」。
收藏
取消收藏
分享
