【點新聞報道】吳業坤（坤哥）與胡鴻鈞（Hubert）攜手展開《Kwan-derful Moments》美加巡迴演唱會，先後登陸多倫多及洛杉磯。這對相識多年的好友，首次以「雙人騷」形式進軍海外，除了合唱多首經典金曲盡展兄弟情誼外，更吸引當地高達三、四千名粉絲到場，反應極之熱烈。
談及今次巡演，二人異口同聲指「時差」是最大敵人。坤哥笑言行程密不透風：「去到多倫多真係眼瞓到極點，上台前一直同睡魔搏鬥，好在當地觀眾嘅熱情似『強心針』，直接將我灌醒！到洛杉磯站時差終於適應，兩場我都豁出去唱，估唔到遠在海外都有咁多人支持，真係好感動。」
此行坤哥更帶同太太同行，甜絲絲表示有「賢內助」照顧格外安心：「佢幫我執行李、打點大小事。完騷後我哋仲順道去Las Vegas玩，又去咗大峽谷同羚羊峽谷觀光。返港後就要馬不停蹄準備上海演唱會同《試真啲》拍攝。」
至於Hubert則自嘲全程「暈吓暈吓」：「由出發到離開都好似未轉到時差，不過咁都好，返到香港唔使再重新適應！好彩歌迷熱情到爆，一企上舞台同坤哥夾一夾，Jet lag即刻消失，精神晒！」講到途中趣事，Hubert透露在加拿大與當地樂隊綵排時，Band Leader話因為部分樂手不識中文，特登將他們歌名全部譯成英文溝通，令兩人覺得又新鮮又搞笑。不過最驚險要數由加拿大飛美國過境時的機場插曲。Hubert憶述：「完全估唔到海關人龍咁長，我哋差唔多臨起飛前10分鐘先衝到閘口，真係緊張到心臟都跳出嚟！」幸好兩場演出最終順利完成，臨走前還爭取半日時間於洛杉磯四圍玩，為今次美加之旅畫上完美句號。
（點新聞特約記者陳惠芳報道）
（本文為作者觀點，不代表本媒體立場）
收藏
取消收藏
分享
