【點新聞報道】不少移民英國的港人以為買入新樓，就可以安居樂業，點知搬入去不久，就發現隨時會冇水冇電，物業管理公司又一副愛理不理，結果落得叫天天不應，叫地地不靈的悲慘境地。有移英港女抱怨大廈突然停水超過24個鐘，搞到揦手唔成勢。
該移英港女在社交平台threads發文大呻，在英國的生活「真係鑊鑊新鮮鑊鑊金」，形容是「大癲」。原來樓主遇着大廈突然停水，「由噚日夜晚7點開始，屋企全屋供水就開始唔穩定，一時有少少水，一時冇水。我即刻拿拿聲儲定一大盤水，起碼都仲有得洗手、沖廁。點知去到10點，直頭一滴水都冇。」
結果一班大廈住戶全擠在大堂，七嘴八舌討論事件，擾人的噪音，搞到樓主冇覺好瞓，「成晚啲住客喺大堂開會，個個行嚟行去睇水泵、傾計，但冇人知發生咩事，最慘係個大堂係類似中庭嘅open area，所以佢哋講嘢我喺屋企都會聽到，嘈喧巴閉搞到我都冇覺好瞓。」
如果想寄望物管會即時替住戶解決問題，簡直是痴人說夢。樓主提到「最勁係物業管理公司個24小時emergency hotline，一如既往冇人聽。之前無啦啦警鐘響成晚，都係一樣搵唔到人搞。留言信箱仲要先警告你：『如果唔係緊急事故，會收返你錢。』半夜send咗個email問咩事，到依家都係唔覆，唔會有update，唔會有解釋，唔會有預計維修時間。」
至翌日早上，樓主仍只能用僅有的儲水盥洗，趕出門上班，「今朝8點終於有人嚟睇，聽就聽到佢哋喺度行嚟行去，check呢樣Check嗰樣，不過就我返工之前都仲未整好，結果連沖個涼都冇得沖。好彩屋企仲有幾支2L水，如果唔係連牙都唔洗旨意刷。」
查實，樓主一早已發現大廈水泵有問題，向物管投訴過，「半年前我已經投訴過個水泵，嘈到爆之餘，每次屋企有水經過，水管聲都大到以為有咩大型裝備喺個牆入邊。仲因為咁請咗幾次unpaid假留喺屋企開門畀佢哋檢查。」結果物管只回覆，「水泵冇壞，只係型號太舊所以有少少聲，不過大廈冇錢換。」然後就冇然後⋯⋯，所以咪搞到停水！
帖文引起不少同路的共鳴，紛紛留言分享自身的悲慘經歷，「英國其實係好Ｘ落後，我而家住緊個屋苑都間唔中停電，講緊係New Build盤」、「我都試過，半年唔夠停咗3次水，每次停幾日到一個禮拜，整番好又話要check持續幾個禮拜逢weekdays凌晨12點打後冇水，幢樓落成咗一年咋，2026年起幢樓供水都有問題」、「之前租過一個new build apartment兩三年樓齡，每年冬天總會有幾日無熱水，甚至無水，有一次污水管爆咗浸埋地庫停車場同單車房，住戶年年Ｘ但發展商同管理公司零care」。
有網民直指，「其實如果你喺英國住apartment或租屋咁就真係聽天由命」，更分析指英國的生活質素已大不如前，「第三世界又不至於，不過都差唔多，越嚟越多難民同埋，治安又差，政府又窮，但又要扮民主，扮闊佬，淨係識得收錢加稅，服務就畀唔到人，工黨一向做嘢係點都唔使多講，所以喺英國生活，所有嘢都要有兩手準備，以前嘅英國確實唔錯嘅，但係今時今日嘅英國係完全兩件事。」
收藏
取消收藏
分享
