文/稀思路
如果有留意開稀思路嘅文章，稀思路早已經講過，日本首相高市早苗上任以來，對外挑火頭，對內無力解決經濟問題，呢種「搞事多過做事」嘅作風，會令民望一直走低，結果又被稀思路講中，日本多項民調顯示，高市早苗嘅支持度已經跌至五成以下，最低更只有41%。據了解，高市早苗正研究改組內閣同執政自民黨嘅高層，問題嚟喇，如果係高市早苗本人執政有問題，係咪佢改組內閣、換下班子就解決問題呢？
我哋先由佢民望講起，筆者記得，喺高市早苗上任初期，民望都幾高，曾經衝上七成以上，但上任時民望係一回事，上任後又係另一回事。高市早苗有冇做過咩改善民生，外界似乎冇乜印象，但佢挑火頭大家實記得，佢一句「台灣有事即係日本有事」，瞬間激嬲成個中國，令兩國關係緊張，之後嘅一系列外交活動，想周圍拉幫結派，但效果係點，真係見人見智。
睇返報道，日本《每日新聞》民調顯示，高市早苗內閣支持率比上月大跌10個百分點，至41%，不支持度升至44%，執政以來首次出現不支持多過支持嘅「死亡交叉」。其他機構民調，部分指高市早苗民望跌穿五成，部分指跌到五成左右，無論係跌到幾多，一個無可爭議嘅事實，就係高市早苗民望大跌！
高市早苗開始被民眾討厭，到底去到咩程度？讀者們可以從一啲新聞感受到，7月28日，日本熊本縣發生7.1級地震，筆者執筆時至少有38人死亡，身為日本首相，高市早苗喺8月3日早上抵達熊本縣，希望了解當地民眾面臨嘅挑戰同需求，但係同時，就有消息傳出，當民眾知道高市早苗要到訪熊本縣後，社交平台就出現強烈反彈，有網民質疑高市早苗出行嘅時機同必要性，簡單啲講，就係「唔太歡迎」高市早苗。
過去幾個月嘅日本，深受能源危機、國內經濟問題等影響，一啲好留意日圓走勢嘅人，仲會見到日圓持續走弱嘅情況，貨幣走弱，就可能會推高通脹，高市早苗有冇方法解決社會問題，筆者唔肯定，但就睇到佢「好有心思」地正式成立國家情報局。對於高市早苗政府嘅行徑，我國外交部就批評日本以國安威脅為藉口，加速再軍事化，威脅地區和平穩定。
關於日本政府嘅行為，當中嘅底層邏輯，就係內政不濟，所以大搞外交，筆者覺得日本國內問題，高市早苗無力解決，所以喺挑釁中國方面，佢就好用力咁滋事，以挑動仇恨來爭取民眾支持，但影響自己同中國嘅合作，肯定之後會更傷。其實我哋睇世界局勢，日本同佢「老大哥」美國都有啲相似，對於國內問題，佢哋似乎解決唔到，但對於國際政治甚至衝突，卻樂此不疲地去介入、參與。當一個國家嘅政府，係搞事多過做事，埋單計數，肯定係當初支持佢哋嘅民眾受苦，相信無論高市早苗改組內閣幾多次，結果都係冇分別！
收藏
取消收藏
分享
