【點新聞報道】近日有IKEA「霸位黨」公然躺在展示區的床上玩手機，玩到瞓着，結果被他人踢走鞋子，瞓醒後要赤腳周圍搵鞋，惟仍遍尋不果，引起網民熱議。
港產片《毒舌大狀》、《夜王》導演吳煒倫本月2日在社交平台發文，講述自己曾遇上「霸位黨」，想試坐通常都會遭佔用者白眼，「IKEA梳化人坐晒就不嬲㗎喇，想試坐，禮貌地請佔用者借一借開，通常都會遭佔用者白眼，我試過俾佢鬧添，話我搶佢個位坐。」
吳導續指，有人更變本加厲連床都霸佔，「今日，進化了，床都有人瞓。我之前未見過人瞓床的。今日嗰位先生，除咗對鞋，成個人瞓喺張床上面玩手機，自己間房一樣，之後見佢好似真係瞓着咗，個樣都瞓得幾安詳」。
正所謂好戲都後頭，吳導指，其後有無良人士，踢走「霸床男」的一對鞋，搞到瞓醒後，要赤腳周圍搵鞋，「跟住，有條好無良嘅Ｘ人，踢走咗佢對鞋。踢到好遠，冇可能搵到。瞓覺嗰位先生就慘，佢瞓醒起身後，發現冇咗對鞋，赤腳咁周圍搵，搵唔到」。
吳導直言「霸床男」好陰功，「出街冇鞋着，今日又落雨又盛，行出去對腳濕dep dep咁，又污糟，黑鼆鼆咁，真係好慘，人神共憤」。從其上載的相片可見，一名男子在店內赤腳站在地上，身旁疑似站着一位穿IKEA黃色制服的職員。
吳導其後逛MUJI想試坐椅子，又遇上另一名「霸位黨」，指「有張凳想試，有位小姐坐咗好耐，埋去禮貌地問佢可否讓一讓開俾我試吓，佢話佢等緊人。嗯，佢有着鞋的。」
帖文吸引不少網民留言，「無鞋着仲慘」、「冇着襪咁盡」、「成件事好fun，好comedy」、「呢個世界上只有你諗唔出嘅橋段」。另有網民二創《夜王》中黃子華的對白稱：「世界艱難，無鞋照行」。
（本文為作者觀點，不代表本媒體立場）
收藏
取消收藏
分享
