【點新聞報道】日日聽住「畀心機讀書」，真係好容易令人透唔過氣。日前一名的士司機接載一對母子前往何文田愛民邨時，目擊小學男童因在車上打機，慘遭母親訓斥「放暑假都唔畀心機溫書，將來一定讀唔到HKU（港大）」。但原來男童是全級考第二名的尖子，落車時司機亦開口幫拖話「個個小朋友放暑假都打機㗎啦，放鬆啲啦」，隨即引發網民熱議。
該名的士司機在fb群組「的士司機資訊網 Taxi」以「HKU」為題發文，分享接載一對母子前往何文田愛民邨的對話，指當時男童一上車就拿出電話玩電子遊戲，隨即觸動母親神經，狂鬧兒子「小學嘅時候已經咁鍾意打機，都冇任何夢想或者目標」。男童隨即反駁話自己有目標，想入讀港大，仲話一定好有信心入到。然而，母親即刻踩多幾句，話「放暑假都唔畀心機溫書，將來一定讀唔到HKU」，之後全程車仍不斷咿咿哦哦。
到達目的地時，司機終於苦口婆心地勸喻，該名母親應讓小朋友在暑假放鬆一下，「我就講句，個個小朋友放暑假都打機㗎啦，放鬆啲啦，唔好逼得佢咁緊呀」。母親聞言辯稱兒子全級考第二、不用逼，「我邊有逼佢啫，佢全級考第二呀，邊洗逼吖」。司機亦順勢稱讚男童，「係囉，一睇就知佢係叻仔」。最後，男童懷住感激眼神，恍惚像說「多謝司機叔叔，好生意呀！」。
帖文引起大批網民熱議，紛紛鬧爆該名母親是「怪獸家長」，「祝願呢位小朋友早日學有所成，搬離呢個怪獸老母既生活」、「佢老母緊張好多喎，會唔會黐線㗎？」、「有啲小學讀書叻嘅係因為父母一直督促，升中就唔再聽父母支笛/父母都教唔到中學嘅嘢了」、「我小學打機打到遲到，放學又去機舖打完先返屋企，而家咪又係兩個master 喺手。打機不知幾有益身心！」。有網民則大讚司機仗義為小朋友講說話，「一兩句分分鐘拯救咗一個破碎弱小心靈。」
（本文為作者觀點，不代表本媒體立場）
收藏
取消收藏
分享
