【點新聞報道】「舉辦演唱會最年長的華語藝人」的94歲藝人胡楓，早前身體不適，對外透露中了新冠肺炎，他今日（30日）在社交媒體與新抱Jojo拍片交代情況，指其實是膽管炎。
Jojo說：「早前爸爸唔舒服，我哋只係同人哋講爸爸中咗新冠，同埋因為流感高峰期我哋唔俾佢出街，咁其實佢係好危急嘅膽管炎，佢係入咗伊利沙伯醫院嘅ICU嘅。頭尾都昏迷咗4日，因為要插喉，佢當時嘅呼吸係好唔OK嘅，醫護人員話要插喉先至可以幫到佢，所以我哋就因為太擔心，亦都唔想大家知嘅時候，驚有記者去醫院度騷擾到醫護人員，亦都騷擾到佢。」
之後修哥與醫生對話，修哥坦言「好恐怖」。醫生解釋他患膽管炎的原因，透露今次除了通膽管，也幫他做手術切除膽囊，免得第二次發作。修哥感謝醫生，而醫生就說：「你大命！喺天堂打咗個轉，上天話你唔好咁快嚟享福，香港好多市民都掛住你，你遲啲先上嚟享福，所以先救返你，都係你自己嘅福氣啦。」
修哥之後還原自己昏迷後的情況：「當我擘大眼嘅時候，覺得呢度好陌生，有個醫護人員就問我，你叫咩名啊？我答中咗，佢非常之開心，雖然醒咗，但係非常非常之辛苦，可以講五花大綁綁住我隻手，唔俾我拗到個面，又唔可以掂到心口，驚我掂到啲喉就唔係咁好，所以一直落嚟係好辛苦。雖然係辛苦，但係醫護人員非常之照顧我，據我所知，伊利沙伯醫院嘅杏林高手，對我非常之好，好悉心調理，我最記得有一次我喺睡夢中，摸到一雙手，我話醫生，你隻手點解咁凍，醫生就話：『係呀，我啱啱洗咗手！』雖然我摸到佢隻手好凍，我感受到佢內心嘅熱情，對我非常之好。」
修哥續說：「喺我睡夢中，不斷不斷記起我屋企人，我啲仔女，新抱、同埋弟弟妹妹，仲有所有嘅朋友，我都想見返，所以每一段都有我啲朋友出現，有我啲契仔契女出現，每一段都有我嘅屋企人關心我嘅片段，仲有一樣令到我非常之積極嘅，就係諗起有好多網友鼓勵我，平時鼓勵我身體健康，樣樣都要積極，所以我呢段時間都有諗起佢哋，我更加多謝QE（伊利沙伯醫院）ICU嗰啲杏林高手，調理我嘅身體，多謝醫護人員對我好好，我喺度感激感激！仲有另外一個就係浸會嗰啲姑娘個個對我非常之好，非常非常之友善，我亦都多謝佢哋，我喺睡夢中嘅時候，我就同自己講一定要對所有好朋友、屋企人，見返一面，所以我而家做得到，我會多啲同大家傾偈、同大家見面㗎！」他又說很想見契仔契女，所以自己一直都積極人生，順道多謝這麼多年來擔任自己演唱會的朋友。
收藏
取消收藏
分享
