文/稀思路
黑暴運動期間，時任香港民主黨主席嘅胡志偉，喺黑暴現場為暴徒走在最前，一句「我要見指揮官」，成為胡志偉從政嘅「高光時刻」，之後選舉，稀思路冇記錯嘅話胡志偉都有用返相關影像宣傳。但呢個世界，成也蕭何，敗也蕭何，因為參與黑暴，繼而又直接參與非法「初選」，曾經係溫和派代表嘅胡志偉，就成為咗階下囚。近日胡志偉出獄，當佢以為一切會好嘅時候，原來想背刺佢嘅，係攬炒派曾經趨之若鶩嘅外國勢力。見到胡志偉一臉疲態接受訪問，筆者都有啲感慨，踏上黑暴呢條路，最後竟然連英國政府都刁難佢，咁當初佢哋積極宣揚「西方價值」，又為咩呢？
話說，因為非法「初選」案而判囚4年5個月嘅胡志偉，上月底出獄後幾個星期，就出發到倫敦探親，其實佢事前已經「打過招呼」，但當佢入境英國時，就喺入境查驗櫃台被查問，之後仲被帶到羈留室繼續問話；隔咗一段時間，胡志偉獲發「拒絕入境通知」同「入境保釋條件通知」，只可以留英7日，經過不同人士為佢爭取，最新消息係佢可以留喺英國六個月。
筆者喺網上面見到啲評論，大抵意思係英國推出BNO「5+1」計劃，其實原意就係要「保護」一班香港嘅反對派，結果胡志偉入境就被扣留同刁難；對於呢種論述，筆者先唔評論，整件事畀筆者最大嘅感覺，係香港一班反對派或攬炒派，喺過去接近40年嘅時間，一直喺香港爭取「佢哋要嘅民主」，行事、言論都好似西方勢力代言人咁，結果犯法喇，坐監喇，出事後第一個嫌棄佢哋嘅，就係佢哋「曾經嘅主子」，何其諷刺。
有網媒上載咗一段胡志偉接受訪問嘅影片，可能因為筆者太耐無喺媒體上見過胡志偉，佢嘅消瘦程度，都令筆者有啲吃驚，為攬炒而令自己身陷囹圄，筆者內心諗到嘅，係「何必呢？」撇除一啲激進嘅香港政團，本來香港嘅民主黨係最溫和嘅，甚至畀激進派笑係「和理非」（和平、理性、非暴力），既然揀咗和平，點解要喺非法「佔中」、黑暴嗰時，變成縱暴派？縱容暴力，唔單止會傷害到他人，自己都要坐監，曾經係反對派最大黨嘅民主黨，亦因為佢哋選擇支持暴力而煙消雲散，胡志偉今日被英國刁難，最初原因，就係佢哋選擇咗違法同攬炒。
睇唔同新聞，筆者仲有個感覺，就係英國政府雖然最新講法係話畀胡志偉入境半年，但其實唔係英國政府想畀，而係喺英國親香港反對派嘅不同人士，不斷搵英國政府「傾返嚟」，依家仲有個問題，就係胡志偉喺逗留期間，會唔會想延期居留甚至爭取英國嘅定居權。成件事筆者都睇唔透，媒體話胡志偉想定居，胡志偉又否認，到底係想喺英國定居，定冇呢個意思，定係其實知道自己申請定居嘅機會好細？
當初英國BNO「5+1」計劃，筆者一早已經講過，係一場政治騷，黑暴過去，英國政府亦已經冇扮企喺道德高地嘅需要，否則胡志偉入境，就唔會咁一波三折；近期睇唔同關於港人移民英國嘅新聞，層出不窮嘅不幸遭遇，唔少人係移民咗英國，但生活似乎就愈嚟愈差。將來英國會唔會收緊「5+1」計劃，尚未可知，但胡志偉嘅經歷都話咗畀一班香港嘅反對派聽，唔好高估英美政府對「香港反對派」嘅感情，因為做西方國家嘅棋子，講嘅係利用價值而唔係感情。
收藏
取消收藏
分享
