文/稀思路
喺國際關係或者貿易，從來都係一個「你中有我，我中有你」嘅遊戲，某國家以為封殺其他國家有好處，點知會倒過來影響自己嘅供應鏈，呢種損人不利己嘅作風，近年美國經常咁做。最近，有消息傳出美國想禁用由中國推出嘅AI模型，反對聲音最大嘅，真係估佢唔到，係美國本土嘅企業，點解會咁？因為喺美國尤其係矽谷嘅初創企業，日常運作要用到中國嘅AI模型！
22日，美國《政治報》（Politico）報道，有接近200間矽谷初創企業，聯署致函畀美國總統特朗普，呼籲政府唔好切斷美國獲取中國人工智能模型嘅管道，佢哋喺信函強調，如果美國要喺相關領域領先，需要有兩個條件，首先係擁有本土頂尖嘅開放權重模型，以及畀美國開發者繼續使用全球已開放獲取嘅模型。呢班科企代表覺得，美國政府應該採取干預力度最小而且具有針對性嘅安全保障措施，而唔係玩「全面封殺」。
有美國初創公司嘅創辦人就估計過，如果美國禁用中國嘅AI模型，會有幾百間公司即時倒閉。行業翹楚、英偉達行政總裁黃仁勳都指出，人工智能正重塑各行各業，由各國合力打造，開源模型可強化網絡安全、加速技術創新與普及。全球既需要頂尖閉源AI模型，都需要頂尖開源AI模型。即係話，喺唔少美國創科界人士而言，使用中國AI模型，好處遠大於禁用中國嘅模型，算係一種合則雙利嘅論述。
明明美國都有自己嘅AI模型，但咁多美國初創企業都用中國嘅AI模型，當中有兩點好現實，首先係美國主流嘅AI模型，係閉源嘅大模型，可塑性未必及得上中國嘅開源模型。其次，就係用美國嘅AI模型，成本過高，假設每使用一個Token（詞元），用美國模型嘅成本係中國嘅雙倍甚至更多，「小數怕長計」，初創企業講求成本控制，用中國嘅AI模型明顯可以壓低成本。如果美國政府要禁用中國嘅AI模型，某程度上，係叫幾百間美國初創企業「倒閉」。
喺創新科技，尤其AI大模型領域，中美企業發展策略呈現明顯分歧。內地唔少科技企業積極推動開源、開放共享路線，業界普遍重視開源生態建設。開源雖然短期直接收益未必比得上閉源模式，但能夠讓全球開發者、中小企業受惠，同時集合各界力量優化模型，推動技術更新迭代。
反觀美國龍頭AI企業，主力採用閉源模式，核心算法同技術保留喺企業內部，外界只可以透過付費方式調用模型，高昂嘅使用成本，令好多中小企同初創公司卻步。雖然美國都有企業推出開源模型，但開源方案往往有唔同限制，同內地開源生態嘅開放理念有明顯差異。唔少美國企業想用中國嘅開源模型，其實理由都相當充分。
有一點筆者覺得十分有趣，係美國試圖喺唔同領域都封殺中國，但命運弄人嘅係，美國喺唔同領域都「需要中國」，中國嘅開源AI模型係一個例子，讀者們諗下，之前美國政府想封殺TikTok，反對聲音最大嘅就係美國本土人，因為一旦TikTok被封鎖，數以百萬計嘅美國博主，馬上會失去營運、謀生嘅平台。其實，美國政府應該思考下，由晶片、TikTok再到AI模型，美國一直打壓，中國卻一直變強，以往嘅霸權模式，係咪對中國行唔通呢？筆者承認，喺人工智能、大模型研發方面，理論上美國仍然有優勢，但喺AI模型開發上「閉關鎖港」，喺人工智能競賽上，美國最終可能會敗喺自己嘅政策手上。
收藏
取消收藏
分享
