文/稀思路
唔知讀者們有冇睇過《孫子兵法》，好多人以為《孫子兵法》教人點打贏仗，點樣出奇制勝；其實《孫子兵法》嘅主調，係講「上兵伐謀，其次伐交」，最好就係不戰而勝，或者透過外交方式解決問題，因為一涉及打仗，就會勞民傷財，如果戰事拖延，更加係「殺敵一千，自損八百」。《孫子兵法》雖然係古籍，但放到今日依然適用，用美以伊戰爭為例，戰事燒到今日，美國已經用咗近3000億港元，搞到美國防長要申請追加幾百億美元嘅撥款。
日前，美國國防部長赫格塞思表示，對伊戰爭已經耗費耗資375億美元（約2941億港元），佢喺聽證會上提出，總統特朗普要追加670億美元嘅國防預算，以繼續支持對伊戰爭，佢仲話畀議員聽，如果冇緊急增加資金，軍事訓練將不得不縮減。
稀思路睇到事態最新發展，美國眾議院已經通過咗950億美元、即係接近7500億港元嘅撥款法案，主要用喺支持特朗普對伊嘅軍事行動，當中600億美元用喺戰爭、130億美元用喺國安、120億美元用喺補助受特朗普關稅政策影響嘅農民等。若參議院審議都通過法案，法案將送交白宮，由特朗普簽署生效。
表面睇，特朗普應該再攞到錢繼續打仗，其實眾議院通過撥款嘅過程，都幾驚險下，法案以216票對214票通過，共和黨嘅所有議員都投下贊成票，而民主黨則係所有議員都反對，雙方壁壘分明，如果有一、兩個共和黨議員倒戈，法案就好可能不獲通過。由此亦可見，美以伊戰爭，喺美國國內嘅意見都好撕裂。
除咗共和黨同民主黨撕裂之外，仲有一樣嘢被忽視，就係美國現時戰爭嘅隱性成本，由美國突襲伊朗至今，其實伊朗嘅反擊，對美國戰機、基地等都造成損害，就如一啲評論所指，現時美國政府條數，可能係講緊支出，但未必計算到修復美國基地等成本，如果戰事持續，美國政府以至美軍，肯定損失更大，到時會唔會需要千億美元重建基地、重整軍備，真係好難講。
呢幾日，筆者喺網上面睇唔同分析，唔同分析有唔同立場，其中一個講法，係質疑美軍行動無章法，而伊朗則係精準、有效地攻擊美國喺中東嘅要害。之前筆者都分析過，如果美國想透過空襲而更迭伊朗政權或使其屈服，難度好高；依家美國要脅攻擊伊朗嘅重要設施，理論上係可以，但如果伊朗再對準美國中東盟友嘅基建或重要設施，到時邊個慘啲，都係好難估。
其實所有明眼人都睇到，停火、談判係唯一可行出路，美國再極限施壓，伊朗就全力還擊，伊朗以「韌性」對抗美國嘅「強攻」，唔好講美國仲有冇錢打仗，美國缺石油、被攻擊嘅盟友可能會一個又一個倒下。窮兵黷武，最後一定落得失敗收場，過去美軍喺其他地方嘅「成功經驗」，注定今次唔可以複製喺伊朗，從前嘅「地球最強」，往後亦唔會再係「最強」。
收藏
取消收藏
分享
