文/稀思路
隨住英國工黨新黨首安迪·伯納姆於當地時間7月20日正式獲英王查爾斯三世任命為首相，英國政壇又將進入「新時代」。伯納姆一上任，就向全國發表講話，表示自己首要任務，就係幫助民眾緩解生活成本壓力，揚言要為民眾爭取喘息空間，其承諾嘅紓困計劃，據報成本高達幾百億英鎊，大有一種勵精圖治嘅感覺。但係，英國「積弱已久」，新首相一上任就推出形同派錢嘅措施，到底行唔行得通呢？
伯納姆上任無耐，就宣布家庭電費10月起豁免5%增值稅（VAT），預料一般家庭每年可因此節省約45英鎊（約473港元），有關減免將會喺英格蘭、蘇格蘭同威爾斯生效，而北愛爾蘭嘅監管方式不同，但都會相應獲得資金補貼。新上任嘅商業大臣就指出，減稅措施將為民眾提供「喘息空間」，至2027年3月財政年度結束為止嘅資金已確保，此後有任何變動，會喺下一份財政預算案中公布。
正常嚟講，政府間接派錢，各界應該皆大歡喜，但伯納姆嘅措施就受到好大質疑，有人質疑，英國本身有個數碼身份計劃都未獲得資金撥付，當局可能係宣布緊一項「沒有資金來源嘅減稅措施」。BBC就分析，雖然呢項減免「值得歡迎」，但對民眾要繳付嘅賬單總額嚟講，其實影響有限，最重要都係批發能源價格。即係話，如果中東局勢不穩，能源價格持續上升，當局嘅紓困計劃只係杯水車薪。
之前筆者都分析過，英國十年要換幾個首相，英國嘅問題並唔係「換個人」、「叫口號」就能夠解決，自從英國脫離歐盟後，發展走勢「沒有最弱，只有更弱」，過去幾位首相，上台前都講到係威係勢，但真正上任後，基本上都係無力回天，伯納姆一上台就「派糖」，可能佢比部分前任更懂得收買人心嘅遊戲，但講到底，改善經濟先係英國問題嘅底層邏輯。
唔係剩係筆者喺度唱淡，即使係英國媒體，之前都綜合分析過，英國嘅問題，遠自2008年嘅全球金融危機之後，英國人嘅生活水平就一直停滯不前，民眾喺財政上苦苦掙扎，而政府又經常唔能夠兌現施政承諾，無論係通脹問題定係經濟悲觀情緒，基本上從未得到解決。
另外，一個更慘嘅實況，係其他地方以至英國民眾都覺得英國「什麼都不行」，無論係交通、司法以至其他領域，英國不同部門都唔能夠有效運作。一個惡性循環，係英國經濟差，令到英國政府缺乏足夠稅收，然後稅收不足，又導致無錢改善公共行政，結果由基建、教育到醫療等，英國開始樣樣都唔掂。喺咁嘅情況下，就會產生另一個問題，就係英國社會，只有撕裂，而欠缺應有嘅凝聚力。
筆者唔係公共行政專家，但將事情還原基本咁睇，其實英國政府最需要嘅，唔係做政治騷，唔係打壓中國企業，而係切實由底層改善返英國經濟，依家嘅英國，那怕係曾經引以為傲嘅金融、服務業，都有衰落嘅勢頭。當筆者睇到新聞，英國政府要將英國鋼鐵公司國有化，接管本身由中國企業控股嘅企業時，第一個諗法係，如果英國仲當自己喺百幾年前，可以「靠搶」過活嘅，而影響同中國合作，筆者都只能同英國講句，「祝君好運」！
收藏
取消收藏
分享
