【點新聞報道】英國移民政策經常搬龍門，不少移英港人自覺成為犧牲品，但有一對港人夫婦卻「明知山有虎，偏向虎山行」。該名欲移民英國的人妻表示自己懷孕五個月，話同老公最近睇好多幼兒教育的資料後，計劃5-6年內移民英國，指現時家庭月入10萬，打算儲6年錢，係英國非大城市置業咁喎。不過，就被不少網民大潑冷水，「恐怕5-6年後BNO Visa 已經無埋」、「你去到英國都幾肯定99%，唔會搵番依個數」。
該名欲移英的孕婦，用下一代的前途做藉口，話參考過幼兒教育的資料後，打算以BNO Visa一家移民去外國，以為去咗英國天都光晒，「同老公最近睇好多香港幼兒教育嘅資料，覺得香港嘅教育制度同環境已經教唔好小朋友，唔好講壓力大定細，就算小朋友讀得書，我個人認為而家香港嘅中小學課程應付唔到AI時代，DSE改到完全唔需要批判思考能力（esp人文科），讀IB倒不如去外國」。
樓主打算留港搵多幾年錢才起行，「現時家庭月入10萬，無供車淨係供樓，打算儲6年錢，係英國非大城市置業」，遂發文問同路人意見，「有冇香港人都有計劃5-6年內移民英國？」
不過圍爐不成，反被不少網民大潑冷水，「恐怕5-6年後BNO Visa已經無埋，話1-2年內都仲話吖！同埋錢永遠唔會夠」、「5-6年的事，實在太遠，不穩定因素太多，再加上BNO Visa會否仍然存在，都成一個問號？更何況英國工黨執政仍然有三年時間，英國經濟都有好大問題。還有教育政策，不斷再轉變」、「英國學校之間可以差好遠，勁嘅可以有兩成入牛劍，廢既入大學都無幾個。」
不少網民指移英後人工相差一大截，「兩公婆係香港搵十萬，已經係中產級數，你去到英國都幾肯定99%，唔會搵番依個數，你接唔接受到先，好多人講做倉無問題，結果來到就好Ｘ大問題」、「真心勸你諗清楚，香港搵十萬唔易，唔好一時衝動放棄晒香港有嘅嘢，就衝去英國」、「你呢個收入喺香港生活應該好好，唔好對英國有太高期望，可能對小朋友成長好，但對大人嚟講未必好」、「如果其中一個大人要照顧小朋友，變相要一個養三個，計唔掂數」。
收藏
取消收藏
分享
