文/稀思路
世界潮流，浩浩蕩蕩，喺國際政治，好多人認為係一個「誰大誰惡誰正確」嘅世界，例如美國，之前派兵突襲委內瑞拉，之後又無預警地向伊朗開戰，令世界局勢更添動盪。不過，一個國家嘅行為，其他國家一定會看在眼內，最近，美國著名智庫皮尤研究中心（Pew Research Center）發表最新嘅研究報告，國際社會對華看法持續改善，對美國嘅印象不斷下滑。稀思路覺得，中國尋求和平、合作同共贏嘅精神，始終都會得到世界支持，過去多年，中國都係站在正確而正義嘅方向。
相關研究中心嘅調查結果顯示，有多達25個國家對中國抱持正面看法嘅人數超越美國。喺多個亞太及中東國家，兩者評價差距尤為明顯，即使喺澳洲、法國、德國及加拿大等美國傳統盟友中，輿論亦出現明顯轉變，民眾對中國嘅好感度高於美國。有趣嘅係，連美國鄰國加拿大同墨西哥，對中國嘅好感度都高於美國。
根據調查結果，喺意大利、西班牙、哥倫比亞、墨西哥、印尼及馬來西亞等8個國家，對中國嘅好感度創下歷史新高；目前，只剩下以波蘭、以色列、日本、韓國、菲律賓同印度六個國家，對美國嘅評價仍然高於中國。睇返過去幾年嘅數據，其實喺幾年前，各國對美國嘅好感度係高於中國，事隔一段日子，中國全面反超美國，當中意味什麼？
其實，唔止係皮尤研究中心，之前蓋洛普嘅國際報告，喺全球民眾認可中國全球領導力方面，中國已經比美國高出5%。而同樣係皮尤研究中心，美國人對華好感度自2023年以來，好感程度近乎翻倍，而50歲以下美國年輕人對華正面評價比例更顯著高於年長群體。有分析認為，中國堅持獨立自主的和平外交政策，主張國家不分大小、強弱、貧富一律平等，尊重各國人民自主選擇嘅發展道路，反對干涉內政，反對以實力地位凌駕於國際規則之上。而且，喺唔同國家需要支持時，中國就成為佢哋嘅良好合作夥伴。
過去多年（筆者係講緊以千年計算），國際政治都係睇「邊個拳頭大」，近百多年美國就完美示範「唔啱就打」嘅發展策略。相對之下，雖然中國近幾十年軍力都大有進步，但就唔係選擇用武力解決問題，而係面對錯綜複雜嘅形勢，始終用追求和平嘅方式處理各種問題。同其他國家有衝突，希望用協商方式解決；其他國家之間有衝突，就盡一己之力去協調同斡旋，為世界和平盡一分力。久而久之，人心思變，原本傾向全球「老大哥」美國嘅其他國家，見到中美之間嘅態度，亦漸漸傾向支持中國，整個演變過程，中國做得既自然，又漂亮。
之前，好多人都喺度講「東升西降」，除此之外仲有一個合理嘅論述，就係美國等北半球嘅國家，未來幾十年將無力阻止全球南方國家嘅和平崛起，當中有人口嘅因素，亦有南方國家經濟崛起嘅因素。美國總統特朗普一上台，用近乎瘋狂嘅方式去針對唔同國家，可能都係想阻止美國衰落，但係，用霸權、武力方式去維持局面，會唔會更快令美國陷入困境呢？呢個係好值得深思嘅問題。
日前，外交部發言人林劍回應美國有基金會抹黑中國對外交往同國際合作時，就表示中國始終堅持在和平共處五項原則基礎上同世界各國發展友好合作，堅持同世界共享發展機遇，維護國際公平正義，被公認為世界和平嘅建設者、全球發展嘅貢獻者、國際秩序嘅維護者。筆者認為，公道自在人心，中國一直追求和平嘅理想，始終都會得到世界認同以及呼應！
收藏
取消收藏
分享
