【點新聞報道】「同心傳承·愛滿中秋」慈善月餅活動，並聯合打造「鄰舍愛心慈善月餅咖啡禮盒」，邀請藝人陳家樂現身為活動打氣，他自爆愛食月餅，懷念傳統的味道：「我都要食月餅，我鍾意呢種傳統嘅味道，一年先得一次機會！我未俾女女食，因為佢依家就食緊啲原形食物，我想俾佢大少少先至去試！」
是日活動為鄰舍輔導會為受惠機構，家樂表示希望早日與愛女齊做義工，為有需要人士服務：「剛才我聽到佢哋會派月餅俾基層朋友，我即刻有個畫面就係可以帶埋小朋友一齊去做呢件善事，我覺得都好有意義。俾佢去學下幫下同啲長者相處，都係一個幾好教育。（會肉痛佢太辛苦？）我唔會心痛呢啲嘢，我好想佢快啲去感受多啲。有時如果佢跌親，唔係受傷嘅話我都會忍住，反而陳太就會想即刻過去抱起佢！我就會話『佢都無喊，做咩要抱？』（你同陳太邊個話事？）如果佢真係無咩大礙就真係我話事嘅，但佢一喊陳太都會衝過去抱起佢。」
陳家樂講起愛女就滔滔不絕，他表示暑假未有計劃旅行，因為女兒即將升上N班，要為開學做準備：「其實都係玩，上堂都係想佢習慣與不同的人相處。佢平時都係黐住我哋，要學習分離。（會送返學？）依家間學校都係喺屋企附近，如果冇工作我都會送返學。平時女女如果要玩就會黐我多啲，因為佢知道搵我嘅話唔使咁早瞓，如果要嗲、要抱嘅話就搵媽咪！」
（點新聞特約記者陳惠芳報道）
（本文為作者觀點，不代表本媒體立場）
收藏
取消收藏
分享
