文/稀思路
之前日本首相高市早苗同美國總統特朗普會面時，嗰種逢迎、笑容，睇到人呆晒，雖然大家都知道美國係日本嘅「老大哥」，但高市早苗猶如見到偶像嘅笑容同態度，難怪日本國內都有意見。但呢個世界，低處未算低，日前高市早苗訪問印度，又再一次認人哋領導做「阿哥」，而且今次態度更為親暱，佢嘅一舉一動，真係令一向「大男人」嘅日本有少少尷尬。
話說，高市早苗出任日本首相後，第一次訪問印度，印度總理莫迪亦為佢舉行盛大歡迎儀式，仲好熱情咁話「歡迎我的妹妹，日本首相高市早苗」；面對唔同國家慣於笑臉迎人嘅高市早苗，亦好開心咁話「你稱我為美麗的妹妹，莫迪總理。我哋志同道合，將以兄妹關係發展這種關係。」
睇到呢度，稀思路就諗起陳奕迅有首歌叫《兄妹》，其中一句歌詞係「就讓我們虛偽 有感情 別浪費 不能相愛的一對 親愛像兩兄妹」，不過，兩者之間當然唔係愛情或者兄妹之情啦，實際上，兩個國家只係各懷鬼胎，各取所需，印度需要投資，日本需要盟友，即使表面幾友好，都唔會真係有深交。
先講高市早苗，有聲音指佢無視國內經濟等複雜問題，周圍外訪「搵」朋友，今次嚟到印度，仲公開認人做「大哥」，心入面最大嘅盤算，就係依家日本得罪咗中國，高市早苗想喺亞洲、中國以外嘅其他國家尋找支持；印度係人口大國，又有經濟潛力，而且鄰近中國，係日本最好嘅拉攏對象。
有聲音精準地指出，高市早苗頻密地提出所謂新版「自由開放印太」，日本各層官員訪問菲律賓、越南、澳洲等國家，其實就係搞事。中國講「亞太」，日本就開口埋口講「印太」，但係「印太」呢個字眼，出自美國，依家美國自己都將「印太司令部」改回「太平洋司令部」，日本仲想用相關概念「混飯食」，真係有啲過時喇。
至於印度，據悉未來十年，日本對印度嘅投資會達到620億美元，即係差唔多10萬億日元，並會推動喺印度嘅日本企業「數量翻倍」。即係話，高市早苗帶埋錢去訪問印度，而且擺出一副認人係「阿哥」嘅態度，唔好話印度，即使係其他國家（中國除外，高市早苗仲未道歉同撤回錯誤言論），相信都會歡喜嘅。
國際關係嘅奧妙之處，就係枱面上幾友好都好，枱底下可能會雙方互不信任，筆者舉一個簡單例子，有媒體指高市早苗訪問印度期間，日本政府就有嚴格衞生防疫要求，隨行人員「嚴禁使用當地自來水」，即使用嚟漱口都唔得，只可以用瓶裝礦泉水，如果事情屬實的話，日本連印度嘅水源都完全信唔過、唔用，咁如果日本企業更多落戶印度，駛唔駛以後一船船咁將礦泉水運到印度？
唔好畀筆者批中，高市早苗以至日本企業，好可能唔會喺印度得到半分好處，甚至會不和、反面收場，而且日本係咪真係會投資咁多喺印度，都係一個疑問！一點有趣嘅觀察，係高市早苗喺外交方面非常努力，但越努力，就越係喺唔同地方產生笑話，如果佢繼續「國外國內兩盤棋」皆輸，仲點玩落去？筆者就先睇下，日本點解決石油短缺嘅問題。
收藏
取消收藏
分享
