文/稀思路
最近，美國正喺度慶祝美國獨立250周年，不過呢個紀念性日子，似乎就唔多愉快，因為美國各地持續出現高溫，有唔少地方都出現混亂或者直接取消活動，而作為「主角」嘅美國總統特朗普，就一如以往地吹噓美國有幾「勁」或者有幾多個「第一」，但外界反應似乎就麻麻。外界更關注啲咩，就係特朗普上任美國總統一年多，財富就突然暴漲！
話說，根據特朗普2025年嘅法定財務申報文件，佢舊年透過加密貨幣相關商業交易，獲利超過10億美元。喺佢長達927頁嘅申報文件當中，就申報由「特朗普迷因幣」（Trump meme coin）獲得6.35億美元嘅特許權收益。另外，亦喺世界自由金融（World Liberty Financial）獲得超過5億美元收入；呢間加密貨幣公司，由佢多名兒子等共同創立。
特朗普亦從房地產、特朗普品牌商品獲得數以百萬計美元收入。特朗普靠咩賺咁多錢？筆者相信讀者都心中有數，但係，白宮就否認特朗普藉總統職位牟利，之前白宮已經多次強調，特朗普已將其企業交由一個由子女嘅信託基金持有，仲聲明過「總統本人及其家人從未參與——也永遠不會參與——任何利益衝突行為。」
將所有事情還原基本步，一切就非常清晰，特朗普以至白宮嘅套路，大約係「特朗普資產由其家人管理，唔關特朗普本人事」，但問題嚟喇，特朗普自己無掂生意，仔女繼續做生意，如果唔係因為特朗普係美國總統，代佢處理資產嘅家人或受託人，有冇可能從幣圈、發售商品中賺錢呢？答案係好難，相信至少有部分錢，係因為特朗普嘅總統身份而能夠賺，一句「家人處理」就當唔關事，美國人信唔信？
事情一直發展落去，如果中期選舉係民主黨得利，民主黨好有機會做兩件事，第一就係無間斷地彈劾特朗普，即使唔成功，有關行動都會持續到特朗普卸任。第二，就係要求調查特朗普有冇以權謀私，而且即使特朗普卸任後，情況可能會繼續。美國嘅兩黨之爭，從來都係有機會就唔放過對方，特朗普一年之內資產暴漲，相信民主黨已經「儲緊子彈」。
如果有睇到特朗普資產嘅相關新聞，仲有一個幾特別嘅地方，就係特朗普嘅新增收入，有部分係來自傳媒，因為特朗普慣於向媒體興訟，其中，針對美國廣播公司（ABC）訴訟嘅1600萬美元、來自哥倫比亞廣播公司（CBS Broadcasting）及CBS互動（CBS Interactive）嘅1600萬美元、來自Meta嘅2450萬美元、來自YouTube嘅2200萬美元，以及來自X平台嘅800萬美元。
當香港有反對分子強調新聞自由嘅「絕對」，大家不妨睇下「自由社會」美國，如果媒體言論被視為不當、誹謗等，一樣會畀人告，而且賠款係以億計嘅港元去計算。特朗普告媒體，筆者唔去評論對與錯，但做新聞，都要講事實同責任，相比之下，特區政府就謹慎得多，即使被抹黑，多數只係反駁而唔會興訟。
特朗普嘅例子話畀全世界聽，有民主選舉而缺乏制衡，對美國以至世界可以構成災難，特朗普嘅資產漲幾多係一回事，筆者覺得，世界各地包括伊朗等生靈塗炭，更大件事，更唔應該發生！
（本文為作者觀點，不代表本媒體立場）
收藏
取消收藏
分享
