文/稀思路
夏天，唔止為大地帶來雨水，而且為我哋帶來炎熱嘅天氣。可能因為全球暖化，依家嘅夏天，感覺特別熱，喺遙遠嘅歐洲，今年就受到熱浪侵襲，熱死唔少人，亦有人因為跳水降溫而溺斃。因為一向唔習慣安裝冷氣，所以歐洲最近亦出現一陣冷氣搶購潮，中國產品成為熱門貨。購買中國產品，我哋當然歡迎，但如果一邊搶購中國冷氣，一邊又加稅想打擊中國嘅小包裹，似乎就有啲雙重標準喇。
歐洲多地嘅搶購冷氣潮，可以話係「搶得恐怖」，中國製冷氣由大約8000港元，升至2萬多港元，物流企業菜鳥表示，今年6月其歐洲倉庫嘅移動冷氣，出庫量升咗十幾倍，其中英國、德國同波蘭，連同冷氣機檔風板等配件，出庫量都增加咗12倍。
可能讀者會覺得奇怪，點解歐洲人會搶購冷氣？因為大部分歐洲人，本身係唔興裝冷氣，好耐之前，筆者同學喺歐洲畢業旅行時，就同筆者分享過點樣喺攝氏37度下，「如何沒有冷氣地睡着」；據了解，現時歐洲冷氣嘅普及率大約只有20%，而且傳統分體式冷氣機安裝需打孔、費用高昂且等待漫長。
中國製嘅移動冷氣就唔同喇，唔駛打孔而且安裝簡單，可以即插即用，完美地配合歐洲舊式建築嘅各種場景，所以就賣到斷曬貨。筆者睇新聞，有人為咗搶購中國製冷氣，開車奔馳200公里；亦有新聞畫面見到歐洲人搶購冷氣時，果種墟冚同瘋狂，真係令人有啲震驚，歐洲人用腳、用錢投票，中國製產品係得嘅！
不過，筆者近日睇唔同新聞，總體感覺係歐洲人以至歐盟係雙重標準，因為喺佢哋搶購中國製冷氣同時，亦開始抵制中國低價貨品。日前，歐盟開始對廉價電商包裹徵收每件3歐羅（約26港元）費用，想遏制希音（Shein）、Temu同阿里巴巴旗下「全球速賣通」等中國電商平台繼續進軍歐洲市場。好明顯，中國貨品價廉物美，歐盟覺得歐洲企業等受到威脅，所以就用徵稅一招嚟打擊中國電商。
以前，大家都講全球化，唔同國家進口自己冇比較優勢嘅產品，然後又生產自己有比較優勢嘅產品，令唔同國家都喺貿易中得益。但近年，似乎保護主義開始戰勝全球化倡議，歐盟嘅行為，冷氣想要，平價貨就想拒絕，擺明係輸打贏要，亦有違自由貿易嘅精神。而且，喺中國電商平台進軍歐洲時，中國貨品嘅合理價格同高質素，係會令歐洲民眾受益，歐盟如果單純以「歐洲企業」角度睇相關貿易，眼光可能就顯得狹隘。
喺之前，中方多次重申，關稅戰、貿易戰沒有贏家，雙方應在平等、尊重、互惠嘅基礎上協商解決有關問題。筆者想問，當歐洲打開中國市場時，就將汽車、電子產品等大量出售到中國，而且自己貨物唔夠性價比，就即刻想「閂門」？咁歐盟以至其不同國家，仲係唔係奉行緊自由貿易？如果言行一致，係咪應該連中國製冷氣都唔買？歐盟過去兩年完全畀美國壓住，好似原則欠奉咁，都係有原因嘅！
（本文為作者觀點，不代表本媒體立場）
收藏
取消收藏
分享
