【點新聞報道】盧宛茵出席《給阿嬤的情書》特別場。由於該電影故事內容十分感人，盧宛茵自言眼淺容易喊出來。
盧宛茵視本月初離世鍾景輝（King Sir)是恩師，更說：「係King sir佢教我哋演戲，我演嗰套《朱門怨》就係佢教我哋嘅，佢淨係教咗4期訓練班，我好榮幸可以畀佢教到。佢教我哋何謂戲劇，講解得好深入，好仔細，真係令我哋獲益良多。我到依家幾十年嚟都係用佢教嘅呢套去演戲，我從唔覺佢啲嘢out，有啲人會覺得我哋呢啲老嘢已經不合時宜，我就覺得依家有啲人演戲阿茂整餅，好多餘，自己會睇到好激氣。」
提到她日前透露拍攝劇集《非份之罪》期間被導演當眾罵「戲屎」一事，她說：「嗰次係我已經忍咗佢5、6日，一直對我吹毛求疵，我係跟大師教演戲出身㗎嘛，佢都唔係正統學演戲嘅，係做PA跟上嚟，邊識演戲吖，佢故意為難我，話我啲戲唔夠，叫我拍枱嗰啲，話我一碌木咁喺度做咩，佢劇本都無睇就話我，我咪同佢講我啲戲唔係大誇，當面同佢理論，佢都當場呆咗。佢根本唔識咩係演戲。我啲朋友話佢唔敢話啲主角，係蝦我呢啲老嘢，我演嘅係有深度嘅戲，唔係好浮誇嗰種，我話不如寫我移民啦，我唔拍喇，今次真係第一次畀你咁樣話我，好奇怪。我哋以前跟King Sir，拍戲前係有排過先嘅，依家無㗎喇，埋位就嚟，可能時代唔同咗，我唔係好慣，唔係好啱呢套模式。（會否接少啲戲？）我會認真睇下好唔好，睇對手睇劇本。」
（點新聞特約記者陳惠芳報道）
收藏
取消收藏
分享
