文/稀思路
可能讀者都會知道，稀思路有時會留意一啲關於創新科技嘅新聞，而當中講到關鍵設備同材料，又會涉及到中美博弈，基本上過去嘅美國，就係同中國玩鎖喉。中國需要先進光刻機，美國封殺；華為5G科技領先全球，美國又聯同其他西方國家封殺，中國依家嘅芯片、製程，都係自己摸索出嚟。近日，蘋果公司（Apple）嘅電腦、平板產品大幅加價，有新聞指蘋果公司想買中國嘅存儲晶片，但相關公司又喺美國國防部嘅「中國軍事企業清單」，美國嘅邏輯實在古怪，政府想封殺，企業想入貨，美國所謂自由市場，其實都係假嘅！
前幾日，筆者同家人商量，可能會買部蘋果新平板畀小朋友用，但有關型號已經由4000幾元升價到6000元。如果要用6000元買一部平板，點解唔直接買部手提電腦？有留意蘋果產品嘅人都知道，本身嘅蘋果電子產品已經貴過人，如果「貴上加貴」嘅話，啲「果粉」係咪仲義無反顧繼續買呢？難怪蘋果產品加價消息一出，其股價即刻大瀉。
回到美國國防部嘅「中國軍事企業清單」，其實今次涉事嘅長鑫存儲喺今年年初（仲包括另一間中國存儲巨頭），曾經一度被移除出有關清單，但之後公司又被加返入清單。根據美國《國防授權法》，被列入所謂「中國軍事企業清單」嘅企業唔會自動觸發制裁，但蘋果若與清單上公司合作，將面臨重大政策同聲譽風險，尤其係美國商務部去年曾計劃將長鑫存儲列入「實體清單」，但因為美國當時正同中國進行貿易戰休戰談判，長鑫存儲才得以「暫緩」進入該清單。
呢單嘢，就算蘋果公司想買中國存儲晶片，而買完冇「實際後果」，其實都係唔買得，因為之前，美國政客就作出警告，話蘋果如果同所謂中國軍企合作係「嚴重錯誤」；再之前，未做國務卿嘅魯比奧亦警告過，如果蘋果產品用中國製造嘅晶片係「玩火」。即係，蘋果就算買完唔會有明顯嘅法律後果，但不斷畀美國政客恫嚇，點會敢買？
成件事十分簡單，就係美國政界、政客想再一次封殺中國嘅科技產品，係咪同中國有軍事合作，係咪軍工企業，唔需要講證據同事實，一直都係任美國政客講；正如之前，美國想封殺TikTok時，最鍾意講TikTok有後門將資料傳送返去中國，但講咗咁耐，「後門」喺邊？喺TikTok問題上，美國想「合法打劫」中國企業，到今次中國嘅存儲晶片，其實係想阻止中國嘅晶片企業發展，喺科技領域上對中國作出全方位打擊。
蘋果公司之所以對存儲晶片需求高，而且想尋求更低價嘅存儲晶片，背後嘅原因，仲包括近年人工智能嘅發展，搶貴晒啲記憶體，當中力推人工智能發展，想靠一鋪人工智能浪潮「再贏幾十年」嘅美國，將人工智能運算、存儲晶片等搶貴晒。蘋果公司嘅電子產品暢銷全球，自然對存儲晶片需求極大，當美國帶頭搶攻人工智能領域，將唔同晶片價格推高晒，然後又唔畀美國企業去買價格較低嘅中國晶片，成件事真係「有趣」！
在美國而言，從通訊設備、運算晶片同存儲晶片，會一直試圖打壓中國，但神奇嘅係，美國一直針對，中國就發展更好，喺人工智能晶片、存儲晶片以至大型模型等方面，都有長足嘅發展。所以，一啲學者或者科企巨擘都冇講錯，同中國合作，尚且可以令中國購買更多美國科技產品；打壓中國，結果令中國自己研製出產品，導致美國政府同企業賺更少。不過，美式邏輯呢，由商貿、衝突到科技戰，過去幾年總是在「錯的路線」，真係想勸止佢都難。
（本文為作者觀點，不代表本媒體立場）
收藏
取消收藏
分享
